Вазирлар Маҳкамаси ҳузуридаги Дин ишлари бўйича қўмита раисининг ўринбосари — Диний-ижтимоий жараёнларни ўрганиш ахборот-таҳлил маркази директори лавозимига тайинлов амалга оширилди.
Адлия вазирлигининг хабар беришича, шу вақтгача Давлат хавфсизлик хизмати (ДХХ) тизимида ишлаган Дилшод Эшнаев қўмита раиси ўринбосари — ахборот-таҳлил маркази директори этиб тайинланган.
Хабар беришларича, Дилшод Эшнаев Ўзбекистон Мустақиллигининг 27 йиллиги тантаналари арафасида Президент Шавкат Мирзиёевнинг фармонига мувофиқ, «Содиқ хизматлари учун» медали билан тақдирланган.
Эшнаевгача Дин ишлари бўйича қўмита раиси ўринбосари — Диний-ижтимоий жараёнларни ўрганиш ахборот-таҳлил маркази директори лавозимида Нуриймон Абулҳасан иш олиб борган. Аввалроқ у ИИВнинг Терроризм ва экстремизмга қарши кураш бош бошқармасига раҳбар этиб тайинлангани маълум қилинган эди.
Нуриймон Абулҳасан билан бирга қўмита раиси — Жасур Акромов ҳам бошқа ишга ўтиши муносабати билан эгаллаб турган лавозимидан озод этилган эди. Унинг қаерда иш бошлагани ҳозирча номаълум, шу вақтгача ДХХ тизимида ишлаган Абдуғофур Аҳмедов эса Дин ишлари бўйича қўмитанинг янги раиси этиб тайинланган.
Адлия вазирлигининг қўшимча қилишича, Вазирлар Маҳкамаси ҳузуридаги Дин ишлари бўйича ҳар бир шахснинг виждон ва диний эътиқод эркинлиги ҳуқуқи, фуқароларнинг динга бўлган муносабатидан қатъи назар тенглигини таъминлаш, шунингдек, диний ташкилотлар фаолияти билан боғлиқ муносабатларни тартибга солиш соҳасидаги вазифаларни ҳал этиш ваколати берилган давлат бошқаруви органи ҳисобланади.
Изоҳ (0)