1 сентябрь куни Фавқулодда вазиятлар вазирлиги Ёнғин хавфсизлиги институтида биринчи босқич курсантларининг ҳарбий қасамёд қабул қилиш маросими ўтказилди. Бу ҳақда институт матбуот хизмати «Дарё»га маълум қилди.
Унда Фавқулодда вазиятлар вазирлиги раҳбарияти, Ёнғин хавфсизлиги институти шахсий таркиби ҳамда профессор-ўқитувчилари, Ёшлар иттифоқи ва бир қатор бошқа жамоатчилик ташкилотлари вакиллари, Сергели тумани ҳокимлиги мутасаддилари, курсантларнинг ота-оналари ва яқинлари, шунингдек, оммавий ахборот воситалари вакиллари иштирок этди.
Ҳозирда институтда 700 нафарга яқин курсант таҳсил олаётган бўлса, уларнинг 150 нафардан ортиғи биринчи босқич курсантлари ҳисобланади.
Тадбирда сўзга чиққан, Фавқулодда вазиятлар вазирининг биринчи ўринбосари, генерал майор Абдулла Қўлдошев, институтнинг биринчи босқичига қабул қилинган курсантларни ҳарбий қасамёд қабул қилганликлари муносабати билан табриклаб, уларга ўзининг самимий ва эзгу ниятларини изҳор этди. Уларни тиришқоқлик ва қатъият билан билим олишга, амалий кўникмаларни ўзлаштиришга, яратиб берилаётган шарт-шароитлардан оқилона ва унумли фойдаланиш лозимлигини алоҳида таъкидлади.
Шундан сўнг институтнинг юқори босқичларида таҳсил олаётган, аъло баҳоларга ўқиётган ва жамоат ишларида ўрнак бўлаётган иқтидорли курсантларга, «Вазир стипендиатлари»га фахрий ёрлиқлар тантанали равишда топширилди.
Изоҳ (0)