Сурхондарё вилояти ҳокими Тўра Боболов Термиз буюм ҳамда озиқ-овқат бозорларига ташриф буюриб, у ердаги шарт-шароитлар билан яқиндан танишди, деб хабар беради вилоят ҳокимлиги матбуот хизмати.
Вилоят ҳокими ўз ташрифини Термиз буюм бозорида ташкил қилинган мактаб ярмаркаси фаолияти билан танишишдан бошлади. Тадбиркорлар томонидан 26 турда тавсия қилинаётган ўқув қуроллари, мактаб учун зарур бошқа анжомлар, кийим-кечаклар нархи билан қизиқди.
Ҳозирда вилоятда мактаб ярмаркаларининг 94 таси умумий ўрта таълим мактабларида, 22 таси аҳоли гавжум бозорлар ҳудуди ва атрофларида, 40 таси савдо комплекси ва дўконларда ташкил этилган.
Ташриф давомида вилоят ҳокими харидорлар билан гавжум мактаб ярмаркасида аҳоли учун яратилган қулайликлар, маҳсулотларнинг нархи ва сифати, тўлиқлиги ва захирасини ўрганди. Ўқув қуроллари ва кийимларнинг тўлиқ бўлиши, нархларнинг ошиб кетмаслиги, сотувчиларнинг ўз ишига виждонан ёндашиши бўйича тавсияларини берди.
Вилоят ҳокими сотувчилар ва харидорлар билан суҳбатлашди.
«Юртимизда кўплаб хайрли ишлар амалга оширилаётган бир пайтда бозорларимиздаги аҳвол ҳам шунга яраша бўлиши керак. Бугун нимадир қимматлигини баҳона қилиб, нархларни осонгина ошириб олиш керак эмас. Муомалангиздан, кўрсатаётган хизматингиздан, тавсия этаётган маҳсулотингиз сифати ва нарх-навосидан одамларнинг кўнгли тўлиб қайтсин. Шунда ишингизда унум, бозорингизда барака бўлади», — деди Тўра Боболов сотувчиларга.
Изоҳ (0)