Ўзбекистонда 2019 йилнинг август ойида истеъмол бозоридаги ўртача нархлар даражасининг ой давомидаги ўсиш суръати 2,9 фоизни ташкил этди. Давлат статистика қўмитаси ахборотига кўра, умумий ҳисобда 2019 йилнинг январь—август ойлари давомида истеъмол бозоридаги товарлар ва хизматлар нархи 8,2 фоизга қимматлашган.
2018 йилнинг август ойига нисбатан республика истеъмол секторидаги ўртача нархлар даражаси 16,5 фоизга ошган. Таққослаш учун, 2018 йилнинг августида товар ва хизматлар нархлари ой давомида ўртача 0,3 фоизга қимматлашиб, 2017 йилнинг декабрь ойига нисбатан 6,2 фоизга, 2017 йилнинг августига нисбатан эса 15,7 фоизга қимматлашган.
2018 ва 2019 йилларнинг январь—август даврларидаги ойлик нархлар ўзгариши деярли ўхшаш тенденцияга эга: январь ойидан май ойигача ўртача нархлар даражаси кўтарилган, кейинги икки ой давомида эса нархлар пасайган, август ойида истеъмол нархлари индекси 100 фоизлик кўрсаткичдан юқорини ташкил этган.
Бироқ, таққосланаётган даврларнинг февраль—июль ойларидаги нархлар ўзгариши кўрсаткичлари нисбатан бир-бирига яқин бўлиб, январь ва август ойларидаги тафовут сезиларли даражани ташкил этган (2018 ва 2019 йилларнинг январь ойларида 2,7 фоизга қарши 1,5 фоиз, 2018 ва 2019 йилларнинг август ойларидаги кўрсаткичлар 0,3 фоизга қарши 2,9 фоизни ташкил этган).
Ўтган ойга нисбатан сўнгги 1 йил 8 ой давомидаги истеъмол нархлари индекси ўзгариши динамикаси таҳлилларига кўра, товарлар ва хизматлар истеъмол нархлари индексининг ўсиш суръати жорий йилнинг август ойида максимал даражани ташкил этди (2,9 фоиз). Шунингдек, нисбатан юқори кўрсаткичлар 2018 йилнинг январь, ноябрь ҳамда декабрь ойларида ҳам қайд этилган (2,7 фоиз, 2,3 фоиз ва 2,1 фоиз).
Ўтган йилнинг декабрь ойига нисбатан 2018 ва 2019 йилларнинг биринчи саккиз ойи давомидаги истеъмол нархлари индекси натижаларига асосан, таққосланаётган даврлардаги ўртача нархлар даражасининг энг юқори кўрсаткичлари 2018 йилнинг май ойида (106,6 фоиз), 2019 йилнинг август ойида (108,2 фоиз) қайд этилган.
Умумий ҳисобда 2018 йилнинг январь ойидан 2019 йилнинг август ойига қадар йиллик истеъмол нархлари индекси кўрсаткичларининг минимал даражаси 2019 йилнинг январь ойида (113,0 фоиз), максимал натижа 2018 йилнинг январь ойида (120,1 фоиз) қайд этилган.
Шу билан бирга, ушбу кўрсаткич динамикасини ўрганиш натижаси шуни кўрсатмоқдаки, 2018 йил давомидаги узоқ муддатли пасайиш тенденцияси ҳамда 2019 йилнинг январь—июль ойларида нархлар нисбатан барқарор сақланиб, йиллик истеъмол нархлари индекси кўтарилиш томон ҳаракатланди (2019 йилнинг август ойидаги кўрсаткич 16,5 фоиз, 2019 йилнинг июль ойида 13,5 фоиз).
Йирик гуруҳлар бўйича нархлар ўзгаришига кўра, 2019 йилнинг август ойи натижаларига асосан ой давомида товарлар нархлари ўртача 2,2 фоиз, жумладан, озиқ-овқат маҳсулотлари 2,3 фоиз, ноозиқ-овқат маҳсулотлари 2,1 фоизга кўтарилди. Хизматлар нархлари ой давомида 5,6 фоизга қимматлашди. Таққослаш учун, 2018 йилнинг августида озиқ-овқат маҳсулотлари нархлари ой давомида ўртача 0,3 фоиз, ноозиқ-овқат маҳсулотлари 0,3 фоиз, хизматлар эса 0,4 фоизга қимматлашган
Умумий ҳисобда 2019 йилнинг январь—август ойлари давомида озиқ-овқат маҳсулотлари нархлари 6,9 фоиз, ноозиқ-овқат маҳсулотлари 7,8 фоиз, хизматлар 11,5 фоизга қимматлашган. Йиллик кўринишда (2019 йил август ойи 2018 йилнинг август ойига нисбатан) озиқ-овқат маҳсулотлари нархлари 19,7 фоиз, ноозиқ-овқат маҳсулотлари 11,5 фоиз, хизматлар 18,6 фоизга кўтарилган.
Изоҳ (0)