Қозоғистоннинг Ақтау шаҳрида 30 август куни Ўзбекистон Бош консулхонасининг расмий очилиш маросими бўлиб ўтди. ТИВ матбуот хизматидан хабар беришларича, тадбирда Ўзбекистоннинг Қозоғистондаги элчиси Саидикром Ниёзхўжаев, Қозоғистоннинг Манғистау вилояти ҳокими Серикбай Трумов, бош консул Нодиржон Турғунов иштирок этган ва нутқ сўзлаган.
Ўзбекистон Мустақиллигининг 28 йиллигига ҳамда янги дипломатик ваколатхонанинг очилишига бағишланган расмий маросим ва қабулда Эрон, Озарбайжон, Туркманистон ва Туркиянинг Ақтау шаҳридаги Бош консулхоналари раҳбарлари, ишбилармон доиралар вакиллари ҳамда ўзбек, қорақалпоқ этник-маданий уюшмалари раҳбарлари ҳам қатнашган.
«Тадбир доирасида Ўзбекистонда ишлаб чиқарилган қишлоқ хўжалиги маҳсулотлари тақдимоти ташкиллаштирилди», — дейилади ТИВ ахборотида. 31 август куни Бош консулхонада Ўзбекистондан Манғистау бозорларига қишлоқ хўжалиги маҳсулотларини етказиш бўйича музокаралар бўлиб ўтган ва 2,5 миллион долларлик дастлабки келишувга эришилган.
Ақтаудаги Бош консулхонанинг консуллик округига Қозоғистоннинг Ақтўбе, Атирау, Манғистау ва Ғарбий Қозоғистон вилоятлари киради. Бош консулхона қуйидаги манзилда жойлашган: 130000, Қозоғистон, Ақтау шаҳри, 30-микрораён, 83/1-уй, телефонлар: +77292777117, +77775990050, +77775990051.
Маълумот учун, 2019 йил июнида Нодир Турғунов Ўзбекистоннинг Ақтаудаги бош консули этиб тайинланган эди. Ақтауда бош консуллик очилишини эса Ўзбекистоннинг Қозоғистондаги элчиси Саидикром Ниёзхўжаев 2019 йил май ойида маълум қилганди.
«Нега энди Ақтау? Шаҳар Қорақалпоғистон ва Хоразмга қўшни бўлган ҳамда меҳнат муҳожирлари Россияга йўл олганда ўтадиган Манғистау вилоятининг маъмурий маркази. Ақтау Қозоғистоннинг тез ривожланаётган ҳудудлари қаторига киради. Энг муҳими, бу ерда Каспий денгизига олиб чиқадиган икки порт, ‘Шеврон’ каби кўплаб йирик хорижий компаниялар ваколатхоналари жойлашган», — деб изоҳлаганди элчи.
Изоҳ (0)