Нурсултон Назарбоев дунё ҳамжамиятини ядро қуролларидан воз кечишга, ядро синов полигонларига эга давлатларни эса бу инфраструктурани йўқ қилишга чақирди. Бу ҳақда “Zakon.kz” хабар бермоқда.
«Ядро синов полигонлари бўлган давлатларга бу полигон инфраструктурасини йўқ қилишни таклиф қиламан. Қозоғистонда бу борада тажриба бор, Россия ва АҚШ ҳам бундай тажрибага эга, биз бу тажриба билан бўлишишга тайёрмиз», — деган Назарбоев.
У, шунингдек, ядро қуролига асосланган стратегик барқарорликнинг архаик концепциясини қайта кўриб чиқиш ва ядро қуроллари назоратининг янги тизимини яратиш заруратига эътибор қаратган.
«Шу сабабли ядро қуролини қисқартириш тўғрисида кенг қамровли шартнома тузиш бўйича музокаралар олиб бориш зарур. Ядро давлатларидан қонуний мажбурий хавфсизлик кафолатларининг самарали тизимини жорий этиш жуда долзарб масаладир. Хавфсизлик кафолатлари ихтиёрий равишда ядро қуролидан воз кечган, шунингдек ядросиз мақомга эга бўлган давлатларга берилиши керак»,— деб қўшимча қилган у.
Назарбоев сайёранинг келажагини ўйлаган ядро давлатлари раҳбарлари музокара столига ўтирсагина натижага эришиш мумкинлигини таъкидлаган. «Бу масаланинг асосий иштирокчилари — АҚШ, Россия, Хитой ва бошқа ядро давлатлари раҳбарларига пойтахтимизда учрашиш бўйича расмий таклиф билан чиқдим»,— деган Назарбоев.
Изоҳ (0)