Эрон Ташқи ишлар вазири Муҳаммад Жавод Зариф Япония АҚШ бошчилигидаги Ормуз бўғозини қўриқлаш коалициясига қўшилмаслиги кераклигини айтди. «ТАСС»нинг хабар беришича, бу ҳақда у 28 август куни Иокогамада Япония бош вазири Синдзо Абэ билан учрашуви чоғида билдирган.
Унинг сўзларига кўра, Ормуз бўғозида чет эл қўшинларининг бўлиши унинг хавфсизлигини таъминлашга ҳеч қандай ҳисса қўшмайди, аксинча, Яқин Шарқдаги барқарорликка хавф солади.
Шунингдек, хабарда қайд этилишича, томонлар Форс кўрфази ҳудудидан нефть етказиб бериш масаласини ҳам муҳокама қилган.
АҚШ давлат департаменти июнь ойининг охирида Вашингтон Форс кўрфазида кемалар қатнови эркинлигини таъминлаш мақсадида коалиция тузаётганини маълум қилганди. АҚШ давлат котиби Майк Помпео 23 июнь куни коалицияга турли минтақалардаги давлатларни жалб қилишни таклиф қилган. Хусусан, Вашингтон шундай таклиф билан Токиога ҳам мурожаат қилган.
Аммо Эрон билан дўстона муносабатларга эга Япония Мудофаа вазири Такеси Ивая бир неча марта таъкидлаганидек, ҳозирча у ерга мудофаа кучларини юбориш режаси йўқлигини билдирган.
Изоҳ (0)