Eron Yaponiyadan Ormuz bo‘g‘ozida patrullik qilmaslikni talab qildi

Eron Tashqi ishlar vaziri Muhammad Javod Zarif Yaponiya AQSh boshchiligidagi Ormuz bo‘g‘ozini qo‘riqlash koalitsiyasiga qo‘shilmasligi kerakligini aytdi. “TASS”ning xabar berishicha, bu haqda u 28-avgust kuni Iokogamada Yaponiya bosh vaziri Sindzo Abe bilan uchrashuvi chog‘ida bildirgan.

Uning so‘zlariga ko‘ra, Ormuz bo‘g‘ozida chet el qo‘shinlarining bo‘lishi uning xavfsizligini ta’minlashga hech qanday hissa qo‘shmaydi, aksincha, Yaqin Sharqdagi barqarorlikka xavf soladi.

Shuningdek, xabarda qayd etilishicha, tomonlar Fors ko‘rfazi hududidan neft yetkazib berish masalasini ham muhokama qilgan.

AQSh davlat departamenti iyun oyining oxirida Vashington Fors ko‘rfazida kemalar qatnovi erkinligini ta’minlash maqsadida koalitsiya tuzayotganini ma’lum qilgandi. AQSh davlat kotibi Mayk Pompeo 23-iyun kuni koalitsiyaga turli mintaqalardagi davlatlarni jalb qilishni taklif qilgan. Xususan, Vashington shunday taklif bilan Tokioga ham murojaat qilgan.

Ammo Eron bilan do‘stona munosabatlarga ega Yaponiya Mudofaa vaziri Takesi Ivaya bir necha marta ta’kidlaganidek, hozircha u yerga mudofaa kuchlarini yuborish rejasi yo‘qligini bildirgan.