Andijon viloyatining Buloqboshi tumanidagi Birlashgan mahalla fuqarolar yig‘ini hududida joylashgan, qayta modernizatsiya qilingan Shahrixon gidroelektrostansiyalar kaskadi tarkibidagi Janubiy Farg‘ona kanali GES1 stansiyasi foydalanishga topshirildi. Bu haqda “Daryo” muxbiri xabar bermoqda.
Stansiya ishga tushirilishi munosabati bilan bo‘lib o‘tgan tantanali marosimda “O‘zgidroenergo” aksiyadorlik jamiyati va tegishli gidroenergetika tizimidagi nufuzli qurilish korxona va tashkilotlari, viloyat va tuman rahbariyati, davlat va jamoat tashkilotlari mas’ul xodimlari, faxriylar hamda yoshlar, OAV vakillari ishtirok etdi.
Ushbu GES 1956-yilda Janubiy Farg‘ona kanalining o‘ng qirg‘og‘idagi PQ 144+00 belgisi hududida qurilgan. Uning vazifasi JFKda oqib kelayotgan suvni kerakli miqdorda derivatsiya kanali orqali GESga o‘tkazishdan iborat. Derivatsiya kanali 26 m3/sekundiga suv qabul qilish qobiliyatiga ega. So‘nggi marotaba 1978–1979-yillarda rekonstruksiya qilingan.
“O‘zgidroenergo” matbuot xizmatining ma’lum qilishicha, ushbu GESda modernizatsiya ishlari 2018-yilning yanvar oyida boshlangan bo‘lib, loyihaning umumiy qiymati 5,81 million dollarni tashkil etadi. Loyihani amalga oshirish uchun 2018-yilda xalqaro tender savdolari e’lon qilingan. Unga asosan jamiyat hamda “Energoredurs” qo‘shma korxonasi bilan umumiy qiymati 5,46 million dollarga teng shartnoma imzolangan. Shundan 4,37 million dollar Jahon banki hamda 1,09 million dollar “O‘zsanoatqurilishbank” ATB tomonidan moliyalashtirilgan. Modernizatsiya qilishda zaruriy gidrotexnik asbob-uskunalar Xitoyning Hunan Allanward Hydro Generating Equipment CO., LTD kompaniyasi tomonidan o‘z vaqtida yetkazib berildi. Natijada loyiha belgilangan muddatdan to‘rt oy avval yakuniga yetdi.
— Modernizatsiyaning asosiy maqsadi GESning elektr energiyasi ishlab chiqarish quvvatini oshirish, elektrotexnik, gidromexanik va gidrotexnik qurilmalarining ishonchli ishlashini ta’minlashdan iboratdir, — deydi “Gidroloyiha” aksiyadorlik jamiyati direktor o‘rinbosari, loyiha bosh muhandisi Safar Xolmo‘minov. – Loyihaning umumiy quvvati 2,2 MVt bo‘lib, yillik o‘rtacha elektroenergiya ishlab chiqarish 17,1 million kVt/soatga teng. Bu o‘rtacha to‘qqiz yarim mingdan ortiq aholini uzluksiz elektr bilan ta’minlanishiga xizmat qiladi.
Rasmiy ochilish marosimidan so‘ng ramziy tugma bosilib, GES kaskadi ishga tushirildi va eng ilg‘or texnologik uskunalar yordamida gidroenergetik inshoot dastlabki kilovattlarni ishlab chiqara boshladi.
Tadbir doirasida “O‘zgidroenergo” tomonidan tumandagi ijtimoiy himoyaga muhtoj oilalarning 23 nafar farzandlariga xatna to‘ylari tashkil etildi.
Izoh (0)