«Оренбург» — «Сочи»
Жума оқшомида лига аутсайдерлари «Оренбург» ва «Сочи» жамоалари ўзаро баҳсга киришди. Бу мавсумда ғалаба нималигини билмай келаётган икки жамоа бу ўйинда муроса йўлини танлади. Мезбонлар кетма-кет иккинчи баҳсда дуранг қайд этган бўлса, сочиликлар клуби учун дуранглар серияси учта ўйинга етди.
Ушбу учрашувда «Оренбург» сафидаги ўзбекистонлик футболчи Вадим Афонин тўлиқ ҳаракат қилди.«Рубин» — «Арсенал»
«Рубин» бу турда «Арсенал»ни қабул қилди. Евгений Марковнинг ягона голи ўйин тақдирини ҳал қилди. Бундан аввалги икки турда мағлубият қайд этган қозонликлар мазкур уч очкодан кейин 7-ўринга кўрилган ҳолда пешқадамлар билан орадаги фарқни қисқартирди. Янги мавсумдаги иккинчи мағлубиятини қабул қилиб олган Тула клуби эса 8-поғонага тушиб кетди.
Бу учрашувда ҳам «Рубин» клуби сафидаги ўзбекистонлик ҳимоячи Виталий Денисов захирада қолди.«Уфа» — «Ростов»
Мазкур турда «Ростов» Бошқирдистонга сафар қилди ва «Уфа» билан баҳс олиб борди. Ростовликлар учун ноқулай рақиб ҳисобланган жамоа бу сафар ҳам Валерий Карпин шогирдларини мағлубиятга учратди.
Нигериялик ҳужумчи Силвестр Игбуннинг дубли «Уфа»га ғалаба олиб келди. Ўзбекистон терма жамоаси ҳужумчиси Элдор Шомуродов учрашувда тўлиқ ҳаракат қилган бўлсада, самарли ҳаракатни амалга ошира олмади ва унинг голли сериясига нуқта қўйилди.
Қизиғи шундаки, «Ростов» ўтган мавсумдаги икки ўйинда ҳам «Уфа»ни мағлуб этолмаганди. Шу тариқа, «Ростов» ушбу мавсумдаги илк мағлубиятини тан олди ва турнир жадвалида бешинчи ўринга тушиб кетди.«Спартак» — ЦСКА
Турнинг марказий ўйини Москвада бўлиб ўтди. Унда азалий рақиблар «Спартак» ва ЦСКА жамоалари ўзаро тўқнаш келди. Учрашувнинг дастлабки бўлимида «армиячилар» мезбонларга қараганда фаолроқ бўлди, бироқ вазиятларни голга айлантиришда меҳмонларга омад етишмади. Иккинчи бўлим эса анча қизиқарлироқ ўтди. Дастлаб Самюэль Жиго «қизил-оқлар»ни олдинга олиб чиққан бўлса, орадан кўп вақт ўтмай Марио Фернандес мувозанатни тиклади. Ўйин якунланишига оз фурсат қолганда Жиго дубль қайд этган ҳолда майдон эгаларининг ғалабасини таъминлади.
Шу тариқа, Виктор Гончаренко шогирдларининг тўртта ўйинлик мағлубиятсиз сериясига нуқта қўйилди. «Спартак» эса бу ғалабадан кейин тўртинчи ўринга кўтарилиб олди.Бошқа натижалар
Яна бир пойтахт дербиси «Динамо» ва «Локомотив» ўртасида кечди. 3-дақиқадаёқ одинга чиқиб олган мезбонлар ака-ука Миранчукларнинг голларидан кейин имкониятни бой берди. Биринчи бўлим ўрталарида Алексей Миранчук ҳисобни тенглаштирди, ўйин якунланиши арафасида Антон Миранчук «темирйўлчилар»га иродали ғалаба келтирган голга муаллиф бўлди.
Тур сенацияси Санкт-Петербургда қайд этилди. «Зенит» ўз майдонида «Ахмат»ни мағлуб эта олмади ва мавсумдаги иккинчи дурангни қайд этди. Мазкур ўйинда «Зенит» 80 дақиқадан ортиқ вақт мобайнида бир киши кўп бўлиб ҳаракат қилганди.
РПЛ
6-тур баҳслари16 август, жума
Оренбург – Сочи 1:1
Голлар: 1:0 – 46, автогол Калугин, 1:1 – 68, пенальти Полоз.17 август, шанба
Урал – Крилья Советов 1:3
Голлар: 0:1 – 28 Гинсарь, 0:2 – 79 Соболев, 0:3 – 84 Радонич, 1:3 – 90 Панюков.Тамбов – Краснодар 0:2
Голлар: 0:1 – 2 Вандерсон, 0:2 – 78 Уткин.Зенит – Ахмат 0:0
Рубин – Арсенал Тула 1:0
Гол: 1:0 – 72 Марков.Уфа – Ростов 2:0
Голлар: 1:0 – 40 Игбун, 2:0 – 79 Игбун.Динамо – Локомотив 1:2
Голлар: 1:0 – 3 Филипп, 1:1 – 28, пенальти Ал. Миранчук, 1:2 – 82 Ан. Миранчук.Спартак – ЦСКА 2:1
Голлар: 1:0 – 59 Жиго, 1:1 – 68 Фернандес, 2:1 – 79 Жиго.Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @daryo_sport’га обуна бўлинг!
Изоҳ (0)