Омадсиз Гвардиола ва «Челси», қайтаётган «Арсенал» ва тўхтамаётган «Ливерпуль». АПЛнинг тур тафсилотлари

Футбол мухлислари 17—20 август кунлари футбол бўйича Англия Премьер лигасининг 2-тур баҳсларига гувоҳ бўлди. Биз эса анъанага мувофиқ қизиқарли ва курашларга бой бўлган тур тафсилотлари билан бўлишамиз.

«Арсенал»—«Бёрнли»

Мазкур турни Унаи Эмери қўл остидаги «Арсенал» клуби Лондондаги «Эмирейтс» стадионида «Бёрнли»га қарши баҳс билан очиб берди. Иккала жамоа ҳам ўйинга кўтаринки кайфиятда етиб келганди. Хусусан, меҳмонлар илк турда «Саутҳэмптон»ни 3:0 ҳисобида таслим қилган бўлса, «Арсенал» эса сафарда «Ньюкасл»ни Пьер-Эмерик Обамеянгнинг ягона голи эвазига мағлуб этганди. Ўйин аввалида «Реал»дан ижарага олинган Дани Себальоснинг узатмасини франциялик Александр Ляказетт меҳмонлар посбони Ник Поуп дарвозасига жойлаб қўйган бўлса, 43-дақиқада «Бёрнли» тўпурари Эшли Барнс Лондон клуби дарвозасини ишғол этишнинг уддасидан чиқди. Иккинчи бўлимнинг 64-дақиқасига келиб яна ўша тиниб-тинчимас Себальоснинг навбатдаги узатмасини «тўпчилар» голеадори Пьер-Эмерик Обамеянг голга айлантира олди. Ўйиннинг қолган қисмида эса томонлар бошқа гол ура олмади. Натижада «Арсенал» 2009/10 йилги мавсумдан бери илк марта Премьер лигада мавсумни кетма-кет 2 та ғалаба билан бошлади.

«Саутҳэмптон»—«Ливерпуль»

Илк турда «Норвич»ни мағлуб этган Юрген Клопп шогирдлари бу сафар меҳмонда «Саутҳэмптон» меҳмони бўлди. Томонлар ўйинни жуда эҳтиёткор бошлаши сабаб ҳам мухлислар биринчи голни фақатгина 46-дақиқага келибгина гувоҳи бўлди. Жеймс Милнернинг узатмасидан сўнг бир нечта рақибини чалғита олган Садио Мане чиройли гол соҳибига айланди. 71-дақиқага келиб Маненинг саъй-ҳаракатлари эвазига ҳимоячиларни ортда қолдирган Роберто Фирмино «қизиллар»нинг ўйиндаги сўнгги голини урди. Учрашувга якуний нуқтани эса ўз вақтида «Ливерпуль»да тўп сурган Дэнни Ингз қўйди. Дэнни мерсисайдликлар дарвозабони Адрианнинг қўпол хатосини кечириб ўтирмади. Шу тариқа «Ливерпуль» мавсумдаги иккинчи ғалабасига эришди.

«Манчестер Сити»—«Тоттенҳэм»

Турнинг сўзсиз марказий ўйини Манчестердаги «Иттиҳод» стадионида бўлиб ўтди. Унда сўнгги вақтлар бир-бирига кўп бора дуч келиб, азалий рақибга айланиб қолган «Манчестер Сити» ҳамда «Тоттенҳэм» ўзаро тўқнаш келди.

Учрашувда ҳисобни 20-дақиқада ўтган турда ҳет-трикка эришган Раҳим Стерлинг очди. Орадан уч дақиқа ўтиб аргентиналик Эрик Ламела мувозанатни тиклади. 35-дақиқада эса бошқа бир аргентиналик Серхио Агуэро мезбонларни ҳисобда олдинга олиб чиқди. Қайд этиш жоиз, «Сити»нинг иккала голига ҳам Кевин де Брюйне ўзининг қойилмақом узатмалари билан ҳаммуаллифлик қилди. Иккинчи бўлим эса биринчисидан ҳам қизиқарлироқ ўтди. Захирадан майдонга тушганига 1 дақиқа ҳам бўлмаган Лукас Моура ватандоши Эдерсон қўриқлаётган дарвозани боши билан ишғол қилди. 92-дақиқада Габи Жезус «шпорлар» дарвозасини ишғол қилди. Бироқ ҳакам VAR’га таянган ҳолда «Сити»нинг голини бекор қилди. Ўтган мавсум «Манчестер Сити» Чемпионлар Лигасидан худди шу тарзда чиқиб кетганди. Ўшанда ҳам рақиб «Тоттенҳэм» эди.

«Челси»—«Лестер»

Ўтган турда «Манчестер Юнайтед»дан қаттиқ «тарсаки»ни қабул қилиб олган Фрэнк Лэмпард бошқарувидаги «Челси» 2-турда «Лестер»ни ўз майдонида қабул қилди. Ўйин «аристократлар» учун омадли бошланди. Мэйсон Маунт «тулкилар» ярим ҳимоячиси Уилфред Ндидининг хатосидан унумли фойдаланиб, Каспер Шмейхель дарвозасини ишғол қилди. Биринчи бўлим шу тарзда якунланди. 67-дақиқада эса биринчи бўлимдаги хатосидан тўғри хулоса чиқара олган Ндиди жамоасининг ҳисобни тенглаштирувчи голига муаллифлик қилди. Натижада томонлар дурангга имзо чекди.

«Вулверҳэмптон»—«Манчестер Юнайтед»

Турнинг сўнгги ўйинида «Манчестер Юнайтед» сафарда «бўрилар» меҳмони бўлди. 27-дақиқада Маркус Рэшфорднинг узатмасини Антони Марсьяль қойилмақом тарзда португалиялик посбон Руи Партисиу дарвозасига жойлаб қўйди. Иккинчи бўлиминг 55-дақиқасида эса Рубен Невеш Давид де Хеа дарвозасини жарима майдони ташқарисидан ўққа тутди ва жуда чиройли голга муаллифлик қилди. 68-дақиқада Пол Погба ўзи ишлаган 11 метрлик жарима зарбасини голга айлантира олмади. Натижада «қизил иблислар» иккинчи турга келибоқ очко йўқотди.

Тур рақамларда

•  1. 25 та гол урилди
• 2. Иккита 1:0, учта 2:1, битта 3:1, учта 1:1 ҳисоблари қайд этилди.
• 3. Фақат битта ўйин 2:2 ҳисоби билан тугади.
• 4. Битта ўйинда энг кўп 4 та гол урилди.
• 5. Биринчи бўлимда умумий 17 та, иккинчи бўлимда эса 8 та гол урилди.
• 6. Фақат битта ўйинда ҳет-трик қайд этилди.
• 7. Фақат иккита ўйинда меҳмонлар ғалаба қозонди. Иккала ўйинда ҳам 1:2 ҳисобида.
• 8. Тўртта ўйинда мезбонлар ғалаба қозонди. Яна тўртта ўйин эса дуранг билан якунланди.

Мусобақа жадвали

Тўпурарлар рўйхати

1. Раҳим Стерлинг («Манчестер Сити») — 4 та гол
2. Теему Пукки («Норвич») — 4 та гол
3. Эшли Барнс («Бёрнли») — 3 та гол