«Бавария» ёки «Боруссия Дортмунд»? Бундеслиганинг янги мавсуми ҳақида

Ўтган ҳафтадан эътиборан Европанинг кучли бешлик чемпионатларидан иккитаси — Англия ва Франция янги мавсумни бошлаб берди. 16 август куни эса Бундеслига ҳамда Ла Лигада ҳам 2019/20 йилги мавсум ўйинларига старт берилади.

Ҳисоб бўйича Бундеслиганинг 57-мавсуми 2019 йилнинг 16 август санасида бошланиб, 2020 йилнинг 16 майида якунига етади. Қоидаларга кўра, ушбу мавсумда ҳам мусобақада жамоалар сони 18 тани ташкил этади. Ҳар бир жамоада 34 тадан ўйин ўтказиш имконияти мавжуд. Амалдаги чемпион барчага бирдек маълум ва машҳур «Бавария» ҳисобланади. Хўш, Мюнхен клуби жорий мавсум ҳам чемпионликни сақлаб қола оладими? Нико Ковач жамоасига қайси клублар рақобат тақдим эта олади. Қуйида шулар ҳақида суҳбатлашамиз.

«Бавария»

Германиянинг энг совриндор жамоаси (29 карра чемпион) Бундеслигада янги мавсумни «Ҳерта»га қарши ўйин билан очиб беради. Амалдаги чемпион ўтган мавсум якунига кўра, жамоанинг бир неча юлдузлари билан хайрлашди. Хусусан, Арьен Роббен футболчилик фаолиятига якун ясади. Франк Рибери эса эркин агент сифатида клубни тарк этди. «Реал»дан икки йиллик ижарага олинган Хамес Родригес ҳам ортига қайтиб кетди. Афсуски, уларнинг ўрни ҳозирча тўлдириганича йўқ. Аммо Мюнхен клуби таркибга бир қатор ёш ва иқтидорли футболчиларни қўшиб олди. Жумладан, бир эмас, икки нафар Жаҳон чемпиони «Бавария» сафига қўшилди. Гап Лукас Эрнандес ҳамда Бенжамен Павар ҳақида эканлигини назаримизда, тушундингиз, азиз мухлис. Ёзги трансферлар вақтида «Манчестер Сити»дан Лерой Санени олиб келиш истагида бўлган, «Бавария» раҳбарияти алалоқибат «Интер»дан ЖЧ—2018 вице-чемпиони Хорватия терма жамоаси аъзоси Иван Перишич ижарага олиш билан кифойланади. Бироқ Перишич дисквалификация сабаб «Ҳерта»га қарши ўйинда «Бавария»га ёрдам бера олмайди. Боиси, футболчи «Интер» сафидаги сўнгги ўйинида 5-сариқ карточкасини олганди. Қоидаларга кўра, энди сариқ карточкалари йиғилиб қолган рўй берадиган дисквалификация бошқа чемпионатга кўчиб ўтганда ҳам амал қилади. Бундан ташқари, асосий таркибдаги ўрнини деярли бой берган Матс Ҳуммелс Дортмунд клубига сотиб юборилди. Энди унинг ўрнини Жером Боатенг ҳамда Никлас Зюле билдирмасликка ҳаракат қилади. Серж Гнабри, Роберт Левандовски, Томас Мюллер каби ўйинчилар эса мавсумга 100 фоиз тайёрлигини мавсумолди йиғинларида ҳам исботлаб улгурди. Футбол мутахассислар, мухлислар ва букмекерлар ҳамон «Бавария»ни чемпионликка асосий даъвогар сифатида кўрсатмоқда. Аммо биз бундай дейишдан йироқмиз, бунинг боисини эса қуйида баён қиламиз.

«Боруссия Дортмунд»

Ёзги трансферлар вақтида таркибини Торган Азар,Юлиан Брандт, Нико Шульц, Матс Ҳуммелс каби ўйинчиларни ўз сафига қўшиб олган «Боруссия Дортмунд» бу орқали «Бавария»га жиддий огоҳлик қўнғироғини юборди. Дортмундликлар янги мавсум олдидан ниятларни фақат чемпионлик эканлигини Германия Суперкубогида ҳам исботлади. Хусусан, «Бавария» 2:0 ҳисобида мағлуб этилди. «Боруссия» клубда ўз ўрнини топишда қийналган Андре Шюррлени «Спартак»ка равона қилган бўлса, Себастиан Родени «Айнтрахт Франкфурт»га сотиб юборди. Бундан ташқари ёш ва умидли ҳимоячи Абду Диалло мўмайгина маблағ (32 миллион евро) эвазига ПСЖга пулланди. Умуман олганда, Дортмунд клуби Бундеслигада жорий мавсум фақатгина чемпионлик учун курашиши экспертлар томонидан ҳам таъкидланмоқда. Ўтган мавсум Люсен Фавр бошчилигида илк мавсумни ўтказган клуб Бундеслигада 2-ўринни қўлга киритиши ижобий баҳоланган эди. Бу йил эса бу натижа на мухлисларни ва на клуб раҳбариятини қаноатлантиради. Ҳозирги жамоада чемпионлик учун ҳамма нарса бор. Марко Ройс анчадан бери жароҳат олгани йўқ ва соғлом ҳолатда нималарга қодирлиги кўпчиликка маълум. Жейдон Санчо эса ўйиндан ўйинга кучайиб бормоқда. «Барселона»дан харид қилинган Пако Алькасер катта эҳтимол билан жорий мавсум тўпурарлар пойгасида Роберт Левандовскига рақобат тақдим этади.

Эслатиб ўтиш жоиз, «Боруссия Дортмунд» илк турни ўз майдонида «Аугсбург»га қарши ўтказади. Ўйин 17 август куни бўлиб ўтади.

«Бавария» ва «Боруссия Дортмунд»га қайси жамоалар рақобат тақдим эта олади

Реал олиб қаралганда Бундеслиганинг айни дамдаги ҳеч бир жамоаси Мюнхен ҳамда Дортмунд клубларига на ўйин ва на таркиб жиҳатдан бас кела олади. Аммо сўнгги 15 йилликда «Вердер», «Штутгарт» ва «Вольфсбург» каби клубларнинг қай тарзда Бундеслига чемпионига айланганини унутмаслик лозим. Ўтган мавсум кучли бешликка кирган «Лейпциг», «Байер Леверкузен» ҳамда «Боруссия Мюнхенгладбах» клублари бу сафар ҳам иккала грандга яхшигина қаршилик кўрсатишга ҳаракат қилади. Бундан ташқари «Вольфсбург» ва «Айнтрахт Ф» клубларини ҳам ёддан чиқармаслик керак.