«Навбаҳор»дан кетган Андрей Канчельскис «буюртма ҳисоблар», Наманган ҳокими ва бошқалар ҳақида

«Навбаҳор» клубининг собиқ бош мураббийи Андрей Канчельскис «Матч ТВ»га берган интервьюсида Ўзбекистондаги фаолияти ҳақида гапирди.

— Сиз ишлаган «Навбаҳор» қандай клуб?

— Ўзбекистонда аҳоли сони бўйича иккинчи ўринда турадиган Наманган шаҳри жамоаси. Ўтган мавсум 14 йилдан кейин илк бор медал (бронза) қўлга киритдик. Раҳбариятнинг мақсадлари юқори, инфраструктура у даражада яхши эмас. Мен келган вақтим биз ўйнайдиган майдон ҳолати даҳшатли даражада эди. Мендан аввалги мураббийлар етакчи жамоаларга қарши ўйин олдидан майдонни текислаб чиқишга йўл қўймаган экан, шу орқали рақиб ўз ўйинини кўрсата олмаган. Кейин янги майса тўшалди.

— У ердаги мавжуд ўйинчилар тартибли футбол кўрсата олишга имкон берганми?

— Бор футболчи билан ишладим. Баъзилар кетди, ўзимиз истагандек бўлмасада бошқа футболчилар олиб келдик. Дастлаб келишув бор эди: «Пахтакор»дан тўққиз очко ёки ундан кўпга қолиб кетадиган бўлсак, клуб шартномани бекор қилиши мумкин эди. Компенсация тўлаган ҳолда. Охир-оқибат шундай қарор чиқарилди, лекин биз биринчи даврани мағлубиятсиз якунладик.

— «Навбаҳор» кимга тегишли?

— Ҳокимга. Футболга жон куйдиради, аммо унинг ёнида бошқа жиҳатларга «қайғурадиган» жуда кўплаб маслаҳатчилар бор. «Навбаҳор» жамоасининг «Пахтакор» ёки «Локомотив»га ўхшаб пули кўп эмас, бироқ халқ жамоаси. Мухлислар клубни жуда яхши кўради, аммо улар жуда қизиққон, ҳатто тошбўрон қилишлари ҳам мумкин. Ҳеч қандай мураббий Намагандан яхшиликча кетмаган, у ерда талаб катта. Нолисам гуноҳ бўлади, аҳоли менга нисбатан яхши муносабатда бўлди. Юқори натижага эришмадим, бироқ кучли жамоаларга «жанг» таклиф қила олдик, сафарда ғалаба қозониш бўйича антирекдорлар қайд этилиши тўхтади.

— Жамоа сизгача ғалаба қозонмаган эдими?

— Шундай мавсум бўлганки, жамоа сафардаги ўйинларда бир очко тўплаган. Нима сабабдан эканини тахмин қилаверинг.

— Охиригача айтмайсизми?

— Нотўғри футбол ўйнашган, буни шундай атай қоламан. Кейин мураббий олти минг доллар жаримага тортилди (таҳририят: гап Илҳом Мўминжонов ҳақида) ва футболга оид фаолиятдан беш йилга четлатилди.

— Ўзбекистондаги ҳакамлик ҳақида

— Бир қарашда Собиқ Иттифоқдан ташқарига чиққандек кўрингандим, бироқ у ерга қайта кирдим. Бироқ федерация бошига машҳур ҳакам Равшан Эрматов келгач вазият ўзгармоқда.

— Ўз вақтида Зико, Сколари ва Ривалдоларни олиб келган «Бунёдкор» ҳозир қандай ҳолатда?

— Ақлбовар қилмас пуллар тугади. Бироқ академия ишламоқда, ўйнаётган ёшлар ёмон эмас.

— Бу пулларни ким берганди?

— Бир бой одам, яқинда озодликка чиқди. Унинг вақтида ҳатто мағлубиятга ҳам мукофот пуллари берилган.

— Сиз учун Ўзбекистон ўтмишда қолди. Энди нима қилмоқчисиз?

— Музокаралар олиб боряпман. Тошкентга яқинда бораман — 11 августда «Пахтакор» авиаҳалокатининг 40 йиллигига бағишланган ўйинда майдонга тушаман.

— Августда у ерлар иссиқ эмасми?

— Ҳозир сал кам олтмиш даража атрофида. Кондиционерсиз кундузги вақтда ташқарига чиқмаган маъқул. Фақат кечки саккиздан кейин машғулот ўтказиш мумкин.

— Рамазон ойи машғулотларга халал бермадими?

— Шундай ҳолатлар ҳам бўлди, кўпчилик амал қилди. Бироқ динга қаршилик қила олмайсан. Фақат Қуръонда рухсат этилган баъзи истисноларга таяниш мумкин эди, масалан, сафарга чиққанларга енгиллик бўларди. Жазирамада кун бўйи сув ичмаслик – организм учун ҳақиқий синов.

— Ўзбекистонда ҳам «Манчестер Юнайтед»даги каби шовқин-сурон, сўкишлар бўладими?

— Ҳар хил. Ҳоким ўйиндан аввал қўнғироқ қилиши ва «Уни эмас, буни тушир» ёки «Бугун 3:0 ҳисобида ютишимиз керак» каби буюруқлар бериши мумкин эди. Худди 1:0 ҳисоби ғалаба эмасдек. Менга бундай қўнғироқларни амалга оширмасликни айтдим. Бошида кийиниш хонасига ҳам кирар эди ва «Сиз қандай ўйин кўрсатяпсиз?!» дея футболчиларни койиб берарди. Бир марта биринчи бўлимда ҳисоб 0:0 эди, иккинчи бўлимда 3:0 бўлди. Ўшанда у мазкур ғалаба унинг шарофати билан бўлгани, танаффусдаги танбеҳлар фойда берганини айтди.

Кейин ҳоким билан суҳбатлашиб олдим, унга ўйинчилар билан яккама-якка гаплашиш, бундан ташқари, ўйиндан кейинги кун суҳбат қилишни маслаҳат бердим. Биз бир-биримизни тушундик, ҳаммаси жойига тушди. Бу одам Наманган футболи учун кўп нарса берди, бироқ унинг маслаҳатчилари...