Камбағал ўлишини истамайдиган гўрков, кир машинаси совға қилинган ургутлик эгизаклар, ерга ёпирилган магнит бўрони ва куннинг бошқа хабарлари

6 августнинг эътиборга молик янгиликлари — «Дарё» дайжестида.

«Дарё» ижтимоий ҳаётда ўз ўрнига эга, бироқ жамоатчилик эътиборидан кўпинча четда қоладиган касб эгалари билан суҳбат қилди. Лойиҳанинг навбатдаги қаҳрамони кўп йиллардан буён қабристонда гўрковлик қилаётган киши.

Юрсунали Умаралиев 1951 йилда Фарғона вилояти Олтиариқ туманида туғилган. 40 йилдан буён Полосон қишлоғида жойлашган «Умарали ота» қабристонида гўрковлик қилиб келмоқда.

«Шунақа одамлар борки, обрў-эътибори, мансаби, мол-у давлати туфайли тобути қўлма-қўл бўлиб кетади. Дафн маросими ҳам ҳеч қандай муаммосиз ўтади. Бироқ ҳеч кими йўқ камбағал одамга қийин. Орқасидан бирор одам келмайди. Шунинг учун ҳам ўлса бой ўлсин, камбағал ўлмасин дейман», — дейди Юрсунали ота.

***

«Дарё» суриштирувидан сўнг ургутлик эгизакларга кир машинаси совға қилинди, болалар тиббий кўрикдан ўтказилди.

Бир муддат илгари «Дарё»да Самарқанд вилояти Ургут туманидаги Тўрткўл маҳалласида дунёга келган уч эгизак — Шавкатбек, Зироатхон ва Саидахон ҳақида мақола чоп этилган эди. Материалда тахминан уч ой муқаддам туғилган болаларга масъул ташкилотлар тарафидан эътибор қаратилмагани, айни пайтда оила моддий қийинчиликларга дуч келаётгани айтилган эди.

***

Бугун, 6 август куни Ерга биринчи даражали кучли магнит бўрони ёпирилди.

Мутахассисларнинг фикрича, одамлар магнит бўронини турлича қабул қилади. Айримлар ўзини ёмон ҳис қилиши, кайфиятининг тушиши, ҳолсизлик ёки аксинча уйқучанлик кузатилиши мумкин. Магнит бўрони вақтида ҳатто соғлом одамнинг ҳам боши оғриши, чарчоқ кузатилиши мумкин.

***

Техас штатининг Эль-Пасо шаҳрида жойлашган супермаркетда содир бўлган отишмада уч нафар боланинг онаси бўлган аёл чақалоғининг ҳаётини сақлаб қолиш учун уни ўз танаси билан ҳимоя қилиб ҳалок бўлди.

24 ёшли Жордан Анкондо Walmart супермаркетида ҳалок бўлган 20 нафар фуқаронинг бири.

Жорданнинг 19 ёшли синглиси Лета Жамровскининг маълум қилишича, Анкондо отишма содир бўлганида супермаркетдан фарзандлари учун мактаб анжомларини харид қилаётган бўлган.

***

Қурбон ҳайити намози Тошкент шаҳрида шу йил 11 август куни, эрталабки соат 05:45 да ўқилади. Қолган ҳудудларда тақвим китобларидаги ҳудудларда намоз вақтларидаги тафовутни инобатга олган ҳолда адо этилади.

Мамлакатнинг турли ҳудудларида жойлашган жоме масжидларда шу куни Қурбон ҳайити намози ўқилади.