Мўйноқ тумани ҳудудидаги йирик кўлларда содир бўлган ёнғинлардан сўнг Мўйноқда Ёнғин хавфсизлиги ходимлари томонидан «Ёнғин ўчириш қайиғи» яратилди. Бу ҳақда ЎзА хабар берди.
Қайиқ белгиланган жойларга етиб бориши учун нотекис ва ноқулай йўлларда бемалол ҳаракат қила оладиган 4х4 тоифадаги «ГАЗ-66» русумли автомобилга ўрнатилган. Бу автомобиль қўшимча 1700 литр сув сиғадиган цистерна, 1 дона мотопомпа ва бошқа зарур бўладиган ёнғин ўчириш асбоблари, жумладан, 5 дона ёнғин ўчириш хлопушкаси, ёнғин ўчириш енглари ҳамда сув этиклари билан жиҳозланган.
«Ўзбекистондаги жами қамишзорларнинг 50 фоизи Мўйноқ туманида жойлашган. Қамишзорларда келиб чиққан ёнғинларни бартараф этишда ёнғин хавфсизлиги хизмати ходимлари қийинчиликларга дуч келарди. Чунки ботқоқлик, қалин қамишзорликларга кириб бориш имконияти деярли йўқ. Ёнғин ўчириш транспортларимиз оғирлиги эса 9—11 тонна атрофида. Уни ботқоққа киритиш мумкин эмас», — деган Қорақалпоғистон Ёнғин хавфсизлиги бошқармаси бошлиғи, майор Азамат Давлетов.
«Ёнғин ўчириш қайиғи» эса 2 кишидан иборат экипажга эга. Қайиқда 1 дона мотопомпа (секундига 16 литр сув беради), ёнғин ўчириш енглари (75 миллиметрли сурувчи енг ва 51, 66 миллиметрли босим остида ишловчи енглар) ва 2 дона сув этиклари мавжуд.
Ҳозирги кунда қайиқ Мўйноқ тумани ёнғин хавфсизлиги бўлинмасининг жанговар ҳисобига топширилган.
Изоҳ (0)