Ҳиндистоннинг Жамму ва Кашмир штати ҳукумати террорчилар хавфи борасида олинган разведка маълумотларига асосланиб, зиёратчилар ва туристларни Кашмир водийсидан тезда чиқиб кетишга чақирди, деб хабар беради «РИА Новости».
«Разведка томонидан тақдим этилган сўнгги маълумотларга таяниб, шунингдек, хавфсизлик масалаларини инобатга олган ҳолда Амарнатх-Ятра ғорига ибодат қилиш учун келганлар ва туристлардан тезроқ водийни тарк этишни сўраймиз», — дейилади штат ҳукуматининг баёнотида.
Ҳукумат мазкур огоҳлантиришни Ҳиндистон ҳарбийлари Жамму ва Кашмир штати полицияси билан ҳамкорликда ўтказган матбуот анжуманидан сўнг маълум қилган. Таъкидланишича, Покистон армияси томонидан қўллаб-қувватланаётган террорчилар ғорга зиёратни бузиш ниятида.
Ҳарбийларнинг қайд этишича, Ҳиндистоннинг муқаддас қадамжоси томон этлувчи йўлдан қурол-яроғ ва ўқ-дорилар топилган.
NDTV телеканалининг маълумотларига кўра, теракт 15 август — Ҳиндистон мустақиллиги кунида амалга оширилиши мумкин.
Амарнатх ғори индуизмдаги энг йирик муқаддас қадамжо ҳисобланади. У тахминан 4 километр баландликдаги тoғлар орасида жойлашган бўлиб, асосий қисмини қор қоплаган. Ёз мавсумида ибодат қилувчилар учун очиқ.
Изоҳ (0)