Ўзбекистонда 1 августдан бошлаб давлат идоралари томонидан бир қатор маълумотномалар сўралиши бекор қилинди

Жорий йилнинг 1 августидан бошлаб давлат идоралари томонидан бир қатор маълумотномалар сўралиши бекор қилинади, деб хабар берди Давлат хизматлари агентлиги матбуот хизмати.

Бу турдаги қулайликларни давом эттириш мақсадида навбатдаги ҳужжатлар бекор қилинмоқда. Бунга Ўзбекистон Республикаси Президентининг 2019 йил 15 февралдаги ПҚ–4193-сон «Давлат хизматлари кўрсатиш миллий тизимини янада комплекс ривожлантириш чоралари ҳақида»ги қарори билан асос солинган.

Унга кўра, 2019 йил 1 августдан бошлаб давлат хизматларини кўрсатишда давлат органлари ва бошқа ташкилотлар томонидан:

• жисмоний шахслардан жамғариб бориладиган пенсия дафтарчалари;
• солиқ ва бошқа мажбурий тўловлар бўйича қарзи мавжуд ёки мавжуд эмаслиги тўғрисида маълумотномалар;
• солиқ тўловчининг ҳисобга қўйилганлиги тўғрисидаги гувоҳномалар;
• тўланган даромадлар ва жисмоний шахслардан олинадиган даромад солиғининг ушлаб қолинган суммалари тўғрисидаги маълумотномаларни талаб қилиш тақиқланган.

Эндиликда ушбу ҳужжатлар ваколатли органлардан фақат идоралараро интеграциялашув платформаси орқали тақдим этилиши назарда тутилмоқда.

Ушбу ҳужжатларни талаб қилиш, бир қарашда арзимас ҳолат бўлиб кўринса-да, аммо фуқаролар учун оворагарчиликларни келтириб чиқарарди. «Умуман олганда, энди 6 ойда бир миллионга яқин фуқаролар вақтларини ортиқча қоғозлар ортидан юришгамас, балки ўзлари учун муҳим бўлган ишларга бағишлаши мумкин», — дейилади хабарда.

Юқоридагиларга асосан 2019 йил 1 августдан бошлаб давлат хизматларини кўрсатишда давлат органлари ва бошқа ташкилотлар томонидан жисмоний шахслардан ушбу маълумотларни талаб қилиш Ўзбекистон Республикасининг Маъмурий жавобгарлик тўғрисидаги кодексининг 215(5)-моддасига мувофиқ давлат хизматларини кўрсатиш соҳасидаги қонун ҳужжатларини бузиш деб эътироф этилиб, мансабдор шахсларни ва хизматчиларни маъмурий жавобгарликка тортишга асос ҳисобланади.

«Азиз фуқаролар, агар давлат хизматларини кўрсатиш жараёнида Сиздан юқорида айтиб ўтилган ҳужжатлар талаб этилса, Давлат хизматлари агентлигининг 1148 ишонч рақами, ёки @davxizmataloqa_bot телеграмдаги қайта алоқа ботимизга мурожаат этишингиз сўраб қоламиз», — дейилади хабарда.