Самарқанддаги тўйда китоб тарқатилди

Самарқандда бўлиб ўтган суннат тўйда меҳмонларга китоб тарқатилгани ҳақида «Самарқанд» газетасида мақола эълон қилинди, деб ёзади Zarnews.

Муаллифни яқин дўстларидан бири фарзандларининг суннат тўйига таклиф қилган.

«Бошловчи тўй болаларни олқишлар экан уларнинг барчасини саҳнага таклиф қилди. Тўй қилаётган дўстимиз икки нафар фарзандини, унинг икки укаси эса биттадан ўғлини суннат қилдираётган экан. Болажонлар саҳнага чиқиб келишди. Бошловчининг чорлови билан болажонларга тўй совғалари улашиш учун амаки-ю тоғалар, амма-ю холалар, бобо-ю момолар бирма бир саҳнага чиқишди. Бизни ҳайратга солгани болажонларга берилган тўй совғаларининг асосий қисмини китоблар жамланмалари ташкил қилганди», — дейилади мақолада.

- Мана, болажонларнинг бобоси уларга нима совға қилди, кўрамиз, — деди бошловчи баланд ва ҳаяжонли овозда. – Қойил, отахонга олқишлар, яшанг ота, набираларнинг ҳузурини кўринг. Отахонимиз набираларига китоблар жамланмаси совға қилибдилар. «Сариқ девни миниб», «Шум бола», «Ҳаётга муҳаббат», «Баҳор қайтмайди», «Ўткан кунлар» ва бошқаларни совға қилибдилар. Раҳмат отахон! Раҳмат!

«Бошловчи тўй болаларни гапга солди бири ўзи қизиққан соҳа ҳақида гапирди, иккинчиси шеър айтди, учинчиси қўшиқ куйлади. Хуллас, мен тўйда ўтирганимни эсимдан чиқарибман. Тўй ҳақиқий маънавий-маърифий тадбирга уланиб кетди», — деб ёзади муаллиф.

Тўй ниҳоялаб қолганида эса ҳар бир меҳмонга биттадан китоб тарқатиб чиқилган.

«— Меҳмонларга ҳам совғамиз бор ҳали, - деди тўйнинг эгаси. – Илтимос, кетиб қолманглар.

Мезбон айтганидек, тўй ниҳоялаб борар экан, хизматчилар ҳар бир столга келиб елим халтага солинган совғаларни меҳмонларга тарқата бошлади. Навбат бизнинг столга ҳам етиб келди. Елим ҳалтани секин очиб, ичидаги китобларга назар ташладим. Бир биридан оқил ва доно муаллифларнинг пурмаъно фикрлари жамланган ажойиб ва нодир қитоблар эди. Бу совғадан барчамизнинг кўнглимиз тоғдек кўтарилди», — дейилади мақолада.