Қашқадарё вилоятининг Касби тумани, Жизза қишлоғида яшовчи 75 ёшли отахон қўшмачиликка қўл урди. Бу ҳақда Жиноят ишлари бўйича Касби туман судининг 6 ойлик ҳисоботига бағишланган йиғилишда маълум қилинди, дея хабар бермоқда «Дарё» мухбири.
Йиғилишда сўз олган суд раиси Махфират Очилова касбилик 75 ёшли Э.Ҳ. 5 кун ичида қўшмачилик жиноятини такроран содир этганлиги, шундай бўлса-да, суд унинг ёшини инобатга олиб, қонуний енгиллик берган ҳолда энг кам иш ҳақининг 10 баравари миқдорида жарима жазоси тайинлаганини маълум қилди.
Махфират Очиловага кўра, туман судига жорий йилнинг олти ойи мобайнида 75 нафар шахсга нисбатан 47 та иш келиб тушган бўлиб, шундан 44 нафар шахсга нисбатан 36 та иш кўриб чиқилган. 30 нафар шахсга нисбатан 23 та айблов ҳукми чиқарилган. 13 нафар шахсга нисбатан очилган 12 та иш айблилик масаласи ҳал қилинмасдан тугатилган. 1 та иш тергов жараёнига қайтарилган.
Йиғилишда маълум қилинишича, жорий йилнинг 6 ойи мобайнида судланган жами 30 нафар шахснинг 3 нафарини илгари судланган шахслар ташкил этган бўлса, 27 нафар фуқарога нисбатан биринчи маротаба айлов ҳукми эълон қилинган.
— Жиноят ишлари бўйича Касби туман суди томонидан 6 ой давомида кўриб чиқилган ишлардан маълум бўлишича, жиноятчиларнинг 21 нафарини 30 ёшгача бўлган шахслар ташкил этган бўлса, 2 нафари аёл киши, — дейди суд раиси Махфират Очилова. — Бироқ суд инсонпарварлик тамойилларига амал қилган ҳолда эҳтиёт чораси сифатида қамоқда ушлаб турилган 2 нафар 30 ёшга тўлмаган шахсни суд залидан озодликка чиқарди.
Изоҳ (0)