Яккабоғлик тадбиркор томонидан ёқиб юборилган ҳоким ўринбосари 30 га яқин дўконни бузиб, компенсация тўламагани айтилмоқда

Интернет сайтларию, ижтимоий тармоқларда кун мавзусига айланиб улгурган, яккабоғлик тадбиркор ва ҳоким ўринбосари ўртасидаги воқеа сабаб тадбиркор Баҳриддин Исомовдан ташқари унинг кичик ўғли Муҳаммадрўзи Даминов, қариндоши Сирожиддин Ҳайдаровлар ҳам ҳибсга олинган. Шунингдек, тадбиркорнинг катта ўғли ҳам воқеа содир бўлган жойда бўлмаса-да, 11 соат ИИБ ходимлари «меҳмони бўлган». Бунданам қизиғи, ҳудудда дўкони бузилган тадбиркорлар сони 30 га яқин бўлса-да, ақалли бирортасига ҳам компенсация тўлаб берилмаган.

Воқеа тафсилотларини ўрганган «Дарё» мухбири Отабек Қўлдошевнинг ёзишича, дўконни бузиш таҳдиди тадбиркор ва ҳоким ўринбосари ўртасидаги келишмовчиликдан 15—20 кун илагари ҳам бўлган. Бу ҳақда «Дарё» мухбирига тадбиркорнинг ўғли Шарофиддин Даминов айтиб берди.

— Ҳоким ўринбосари бундан 15—20 кун илгари ҳам дўконимизни бузамиз деб келганди, — дейди Шарофиддин Даминов. – Аммо «қайси асос билан бузасиз», деб савол берганимизда, асосни кўрсатолмади. Шунинг учун қайтиб кетганди. 20 июль кечки соат 16:00 да яна келган. Бу сафар ҳам ҳеч қандай асос келтирмаган. Энг ёмони бульдозерни ўзи ҳайдаб, дўконимизни бузишга уринган. Шунинг учун дадам ва яқинлар қаршилигига учраган.

Шарофиддин Даминовнинг айтишича, у воқеа жойига 17:00 да келган.

— Мен бу ерга келганимда ҳамма воқеа тугаб бўлган экан, — дейди Шарофиддин Даминов. — Шунда прокуратура формасидаги ходимдан нима бўляпти деб сўраганимда, «Сен кимсан», деди. Тадбиркорнинг ўғли бўламан деганимда ёнимдаги ИИБ ходимига қараб «буниям обориб қама», деди. Шунда телефонимни ёқиб, «менинг айбим нима», дея прокуратура ходимига савол бериб, съёмка қила бошладим. Шербек исмли ИИБ ходими эса қўлимни қайириб, телефонимни тортиб олди. Ўзимни эса, ИИБга олиб кетишди. Телефонимни «блоклаш»га улгурдим, холос. Телефонимни ҳалигача қайтариб беришмади.

Шарофиддин Даминовнинг маълумот беришича, ҳокимият савдо дўконини бузиш учун 22 июль куни ёзма тарзда огоҳлантириш берган бўлса-да, огоҳлантириш хатида 20 июль санаси кўрсатилган. Шунингдек, дўкон учун тўланиши лозим бўлган компенсация ҳам тўлаб берилмаган. Ҳудудда 30 га яқин дўкондорнинг дўкони бузиб ташланган бўлса-да, ҳали-ҳамон компенсациядан дарак йўқ.

Шарофиддин Даминов 20 июль кунги воқеадан сўнг, отаси билан бирга ҳибсга олинган укаси 50 соат давомида ИИБда ушлаб турилганини бу фурсатда укаси ИИБ ходимлари томонидан аёвсиз калтакланганини тахмин қилмоқда. Даминов гапининг исботи сифатида «Дарё» мухбирига укасининг тан жароҳатлари акс этган суратини ҳам тақдим этди.

Шарофиддин Даминовнинг қўшимча қилишича, укаси Муҳаммадрўзи Даминов 22 июль кечки пайт қўйиб юборилган бўлса-да, 23 июль куни яна такрорий тарзда тоғаси Сирожиддин Ҳайдаров билан бирга ИИБга олиб кетилган.

Воқеага гувоҳ бўлган Аброр Жўраевнинг айтишича, Муҳаммадрўзи Даминов ҳақиқатдан ҳам ИИБ ходимлари томонидан олиб кетилган.

Яккабоғ туман ИИБ бошлиғи Шерзод Шокиров 23 июль куни 2 нафар фуқаро ҳуқуқбузарлиги учун 19-сонли ИИБ бўлинмасига олиб кетилганини тасдиқлади. Аммо уларнинг кимлигидан бехабарлигини айтди.

— Бугун (23 июль назарда тутилмоқда — Таҳририят) 2 нафар фуқаро дўконни бузиш ишларини олиб бораётган ишчиларни ҳақорат қилиб, уларга сўкингани учун ИИБга олиб кетилди, — дейди туман ИИБ бошлиғи Шерзод Шокиров. – Аммо уларнинг кимлигини билмайман.

Вилоят ИИБ матбуот хизмати орқали ҳуқуқбузарларнинг кимлигини аниқлаштирганимизда, улар Муҳаммадрўзи Даминов ва Сирожиддин Ҳайдаровлар эканлиги ойдинлашди.

Шарофиддин Даминов ҳоким ўринбосари уларнинг дўконини бузишга келганда, тадбиркорларга тегишли тикув цехи, сомсахона ва новвойхонани бузиб ташлаганини айтмоқда.

Журналистик суриштирувларимиз давомида тадбиркор Баҳриддин Исомовга тегишли савдо дўкони туман ободонлаштириш бошқармаси ходимлари томонидан бўшатилаётганига гувоҳ бўлдик.

«Дарё» мухбири билан телефон орқали мулоқот қилган ҳоким ўринбосари Мансур Тўймаев тадбиркор Баҳриддин Исомовга тегишли икки қаватли дўконни бузиш ниятлари бўлмаганини, аслида унинг дўкони ёнидаги хом ғиштдан қурилган тадбиркор Шокир Бердиевга қарашли савдо дўконлари ва маиший хизмат кўрсатиш шохобчаларини бузиш учун борганини айтмоқда.

— Баҳриддин аканинг дўконини бузмоқчи эмасдик, бу ҳақда ўзлари билан ҳам гаплашгандик, — дейди Мансур Тўймаев. – Аслида у кишининг дўкони ёнидаги 50 йилларда хом ғиштдан қурилган бир қаватли дўконларни бузмоқчи эдик. Ўша куни съёмка қилинган видеога яхшилаб эътибор берилса, бульдозер орқали эски, талабга жавоб бермайдиган дўконни бузаётганимизни кўриш мумкин. Баҳриддин аканинг дўконига умуман тегилмаган.

Ҳоким ўринбосари Мансур Тўймаев суҳбат давомида Баҳриддин Исомовнинг дўкони хусусида бундан аввалроқ вилоятдан тадбиркорнинг танишларидан Абдурасул Сафаров исмли киши телефон қилганини, шу боисдан ҳам имкон қадар ўша икки қаватли дўконни бузмасликка ҳаракат қилганини таъкидламоқда.

Мансур Тўймаевнинг маълумот беришича, воқеа содир бўлган Эски Яккабоғ ҳудуди 2018 йил «Обод марказ» дастурига тушган бўлиб, ўтган вақт давомида ҳудуддаги 30 га яқин дўкон бузиб ташланган. Аммо уларнинг ҳеч бирига компенсация тўлаб берилмаган.

— Дўкон эгаларига компенсация тўлаб берилмаганининг сабаби улар ўз вақтида дўконини нархлатмагани, — дейди Мансур Тўймаев. – Бир неча маротаба айтдик, дўконлар бузилишга тушади. Дўконизни баҳолатинг деб. Компенсация тўлаб бериш учун маблағ муаммо эмас. Пул бор. 30 га яқин дўкондорга ҳам кўрсатилган миқдордаги компенсация пулларини, албатта тўлаб берамиз.

Туман ҳокимлиги матбуот хизмати ходими Бозор Азизовнинг маълум қилишича, Эски Яккабоғ ҳудудида айни кунда 10 мингдан ортиқ аҳоли истиқомат қилади. Ҳудудда яшовчи кексалар нафақадаги педагог Носир Турдиев бошчилигида вилоят ҳокими Зафар Рўзиев билан суҳбат давомида ҳудудни ободонлаштириш ҳақида сўрашган. Шу боисдан ҳам ҳудуд «Обод марказ» дастурига тушган. Дастурга кўра, 10 километр масофадан ҳудудга ичимлик суви тортиб келинади. Бузилаётган дўконлар ҳисобига йўл кенгайтирилиб, кўча ободонлаштирилади. Тадбиркор Баҳриддин Исомовнинг бузилажак дўкони ўрнида автотураргоҳ қурилади.

Мансур Тўймаев «Дарё» мухбирининг «Нега ўзингиз бульдозерга ўтириб, бинони бузишга уриндингиз, бунга қай даражада ҳуқуқингиз бор», дея берган саволига: «Тадбиркор Шокир Бердиев икки маротаба трактор ҳайдовчисини қўрқитиб ҳайдаб юборди, «уйингни ёқиб юбораман», деб дўқ қилгач, бульдозер ҳайдовчилари қочиб кетди. Техникани бошқарувчи киши қолмагач, ўзим рулга ўтирдим», дея жавоб берди.

Мансур Тўймаев суҳбат давомида тадбиркор Баҳриддин Исомовни атайлаб одам тўплаганликда айблади.

— Бульдозерга чиқиб, бинони бузишга ҳаракат қилаётганимда, бехосдан зина тепасида турган Баҳриддин Исомовнинг дўконига тегиб кетди, — дейди Мансур Тўймаев. — Аммо ўша пайт Баҳриддин акадан узр сўрадим. Шунга қарамасдан Баҳриддин ака йиғиб қўйган одамларига ишора қилди. Шунда ўша ерда турган аёллар ИИБ ходимларига ташланиб қолди. Мен эса одамлар йиғилгани боис, оғир техникани четга олиб тўхтатдим. Ва вазиятни кузата бошладим. Шунда ИИБ ходимлари аёллар билан овора бўлиб қолгач, тадбиркор Баҳриддин ака трактор томонга югуриб келиб, қўлидаги идишда турган бензинни менга сепди. Трактордан тушиб, тезда қочсам бўларди. Аммо тракторни хавфсизлантиришим керак эди. Тормоз системага қўйиб, моторни ўчиришга ҳаракат қилдим. Шу пайт эса ёна бошладим.

Ҳоким ўринбосари юзи ва ҳар иккала қўли куйгани боис биз билан кўришишни истамади.

Туман тиббиёт бирлашма масъулларининг аниқлик киритишича, бемор Мансур Тўймаев 20 июль куни соат 18:00 да шошилинч тез тиббий ёрдам бўлимига юз-бўйин, иккала елка-билак ва кафтлари алангадан куйиши I-ИИ-III а, даража 10—11 фоиз бўлган ҳолатда олиб келинган. Юқори нафас йўлларининг куйиши I а даража ташхиси билан ётқизилган. Шифокорларнинг айтишича, шошилинч тез тиббий ёрдам бўлимининг шароити, яни кондиционер йўқлиги беморнинг куйган жойлари ачишишига олиб келади дея, реабилитация бўлимининг 6-палатасидан жой берилган. Ҳозирда аҳволи яхши.

Аммо Бош прокуратура матбуот хизмати хабарномасида Мансур Тўймаевдаги куйиш ҳолати 35—40 фоиз эканлиги айтилган ва тадбиркор Баҳриддин Исомовга нисбатан туман прокуратураси томонидан Жиноят кодексининг 25, 97-моддаси (Қасддан одам ўлдириш) 1-қисми билан жиноят иши қўзғатилгани очиқланган.

Маълум бўлишича, ҳолат туман прокуратураси томонидан назоратга олинган. Тадбиркор Баҳриддин Исомовнинг эса айни кундаги аҳволи, қаерга олиб кетилгани ва қай тартибда ушлаб турилгани хусусида ҳеч қандай маълумот йўқ.

Тадбиркорнинг тўнғич ўғли Шарофиддин Даминов ўзларига тегишли дўкон ёнига оила-аъзоларидан ҳеч ким қўйилмаётгани ҳақида шикоят қилар экан, дўкондаги 2 та: бири 12 миллионлик, бири эса 23 миллионлик музлатгичлар, 3 та кондиционер кўчага олиб чиқиб ташланганини, дўкон пастидаги омборхонада эса 100 миллион сўмлик ёғ ва кир совунлари қолиб кетганини айтмоқда.

Давлат раҳбарининг шахсан ўзи «Барча ҳокимларни қатъий огоҳлантираман – асосли зарурат бўлмаган ҳолда тадбиркорларга тегишли мол-мулкни бузишга умуман йўл қўйилмаслиги зарур ва шарт», — деб турганда бир ҳудудга ичимлик суви келтирувчи сув қувурига халал бермаган савдо дўкони ва маиший хизмат кўрсатиш шохобчасининг фақатгина автотураргоҳ қурилиши учун бузиб ташланиши адолатли қарор бўлармикин?