Digital Generation Uzbekistan бошланганига 1,5 ой бўлиб, унинг доирасида ўтган давр мобайнида дастлабки тадбир — Digital Generation Camp ташкил этилди. Мазкур тадбирга республиканинг барча ҳудудларидан 700 дан ортиқ номзодлардан ариза келиб тушган. Улар орасидан 80 нафари эсселарни баҳолаш ва интервью давомида саралаб олинди.
Таъкидлаш керакки, ушбу оромгоҳдаги машғулотларда қатнашиш мутлақо бепул бўлиб, дарс машғулотларини соҳанинг мутахассислари бўлган — кўнгилли ментор ва волонтёрлар олиб боради.
Уларга 18—22 июнь кунлари Бўстонлиқ туманидаги Digital Generation Camp ёзги оромгоҳида ёш, ташаббускор, шижоатли ва малакали менторлар, маҳаллий ва халқаро экспертлар томонидан мастер-класс, тренинг, амалий машғулотлар ҳамда кичик лойиҳа бажариш топшириқлари бўйича дарс ўтказилди.
Натижада, қатнашган барча иштирокчилар ўзлари қизиқиш билдирган соҳалар бўйича (дастурлаш, дизайн, медиа, робототехника) зарур билим ва кўникмаларга эга бўлиб, замонавий долзарб касб соҳиби бўлишида дастлабки қадамни ташладилар ҳамда зиммасига битта масъулиятни олди.
Лойиҳа доирасидаги биринчи оромгоҳдаги ўқувларда қатнашган ҳар бир иштирокчи ўз ҳудудида камида 5 нафар ёшга ўрганган билимини ўргатиш ва тренинг ўтишни бўйнига олди. У ҳам лойиҳа тамойилига асосан бепул амалга оширилади.
Дастлабки тадбир якунида ташкилотчилар томонидан иштирокчилар, ментор ва волонтёрлар фаолияти муносиб рағбатлантирилиши ҳақида айтилган эди.
Шунга кўра, Digital Generation Uzbekistan лойиҳаси ташкилотчилари томонидан 25 нафар ёшлардан иборат гуруҳ жорий йилнинг 5—8 август кунлари қисқа муддатли малака ошириш ва тажриба алмашиш мақсадида Беларусь республикасига юбориладиган бўлди.
Сафар давомида улар ўз лойиҳа ва таклифларини Беларусдаги «Юқори технологиялар парки»да IT-соҳасида бизнес юритиш ва меҳнат бозори каби муҳим йўналишлар бўйича зарур кўникмаларга эга бўлади.
Бундан ташқари, сафар давомида бизнес алоқалар ҳам йўлга қўйилиб, ҳамкорликда лойиҳаларни ишлаб чиқиш, муайян буюртмаларни маҳаллий бозорга олиб келиб, лойиҳа доирасида тайёрланган қобилиятли ёшлар учун имконият эшигини очишга эришилади.
Изоҳ (0)