Навоий вилоятидаги маҳаллий халқ тилида «Канпирдевор», «Девори Канпирак» номи берилган қалъа деворлари V-VI асрларга оид бўлиб, бугунги кунда баъзи тадбиркорлар томонидан қалъа пахса деворлари бузилаётгани, ғишт қуйиш, иссиқхоналар учун унумли тупроқ сифатида талон-торож қилинаётгани бўйича вилоят адлия бошқармасига оғзаки мурожаат келиб тушган.
Мазкур ноёб ёдгорлик 2011 йилда археологик қазишмалар олиб борган хорижий олимлар томонидан мемориал композицияси, мудофаа салоҳияти бўйича қадим Хитой деворига тенглаштирилганди.
Ҳозирга қадар маданий ёдгорлик кадастр рўйхатига киритилмаган, муҳофаза белгилари ўрнатилмаган. Туман, вилоят, мамлакат ёки халқаро аҳамиятга эгалиги – мансублик даражаси ҳам белгиланмаган.
Бепарволик оқибатида қалъа харобалари маҳаллий ғишт қуювчи, иссиқхоналар учун унумли тупроқ макони, тадбиркорлар учун текин хомашё майдони, маданий ёдгорлик муҳофаза белгилари билан эмас, аҳоли томонидан ташланган ахлат уюмлари билан «ўраб олинган», қалъа деворлари консервация қилиш тугул, бульдозер ва юк машиналари излари билан «текисланган».
Ачинарлиси, сайёҳлар қатнайдиган М-37 халқаро автомагистрал ёқасида жойлашган, қадим Бухоронинг 430 километр ҳудудини ўраб олган Буюк Хитой деворига ўхшаган маҳобатли Кампирак деворининг халқаро археологик экспедиция томонидан ўрганилган қисми рўйхатга киритилмаган.
Мазкур ҳолат юзасидан вилоят адлия бошқармаси томонидан Навоий вилоят ҳокимлиги, вилоят маданий мерос бошқармасига кўрсатма ва тавсиялар берилди.
Изоҳ (0)