Кеча, 23 июль куни Мудофаа вазирлиги томонидан бир гуруҳ журналист ва блогерлар учун Жиззах вилоятида жойлашган «Фориш» тоғ-дала полигони бўйлаб медиа-тур ташкил этилди.
Ўзбекистон армияси тарихида ОАВ вакиллари учун ҳали бирор марта бу қадар кенг кўламли тадбир ташкил этилмаган бўлса керак, саёҳат республиканинг нуфузли интернет нашрлари, телевидение вакиллари ҳамда блогерлар учун унутилмас таассуротларга бой бўлди.
Халқаро армия ўйинларининг «Ҳарбий-тиббий эстафета» йўналишига илк бор мезбонлик қилаётган Ўзбекистон меҳмонларни кутиб олишга барча шароитларни яратган. Жиззах бағрида ҳарбий шаҳарча эмас, «Ҳарбий мамлакат» бунёд этилгандек гўё. Армия бўлгани билан миллийлигимизни тарғиб этувчи деталларни ҳар бир қадамда учратасиз. Ҳар бир вилоятнинг ҳунармандчилик ва косибчилик анъаналарини намоёт этиб турувчи уйчалар эса… Шунчаки таҳсинга сазовор.
Уч соат давомида босиб ўтилган узоқ йўлдан кейин «Фориш» полигонига кириб бордик. Ҳарбий оркестр садолари остида кутиб олинган ОАВ вакиллари учун дастлаб матбуот анжумани ташкил этилди. Унда Ўзбекистон мудофаа вазирининг ўринбосари генерал-майор Азизбек Икрамов ҳамда Мудофаа вазирлиги Тиббий таъминот бошқармаси бошлиғи полковник Носиржон Фозилов иштирок этиб, Халқаро армия ўйинлари ҳақида маълумот берди.
«АрМИ—2019» халқаро армия ўйинлари 2019 йилнинг 3 августидан 17 августга қадар 10 та давлат ҳудудида (Россия, Озарбайжон, Беларусь, Қозоғистон, Эрон, Арманистон, Ҳиндистон, Мўғулистон ва Ўзбекистон) ўтказилади. Ундан дунёнинг 85 та давлатидан жамоалар иштирок этиши кўзда тутилган.
Жорий йилда Ўзбекистон қуйидаги 14 йўналиш бўйича мусобақада иштирок этади: «Қўшин разведкаси аълочиси», «Хавфсиз маршрут», «Елбурс ҳалқаси», «Йўл патрули», «Содиқ дўст», «Мерганлар марраси», «Қуролсоз уста», «Мусаффо осмон», «Танк биатлони», «Артиллерия олови устаси», «Дала ошхонаси», «Ҳарбий раллй», «Рембат» ва «Ҳарбий-тиббий эстафета».«Ҳарбий-тиббий эстафета» — ҳарбий шифокорлар ва тиббий бўлинмалар орасида ўқ отиш, махсус тиббий кўникмаларни (биринчи ёрдам, ярадорни жанг майдонидан олиб чиқиш ва бошқа) бажариш бўйича мусобақа. Мусобақа икки босқичда ўтказилади:
- Индивидуал маҳорат;
- Жамоавий биринчилик ва «Энг яхши механик-ҳайдовчи».
Шундан сўнг, генерал-майор Азизбек Икрамов ҳамроҳлигида полигонда яратилган шароитлар билан бевосита танишиш имконияти берилди. Минг марта эшитгандан, бир марта кўрган яхши.
Яратилган шароитлар билан танишиб бўлгач, «Тайфун»да тоғ-дала полигони томон йўл олдик.
Аскар дастурхони эса барчамизга манзур бўлди. Ҳатто айримларимиз шу ерда хизмат қилиб қолишга тайёр эканликларини ҳам билдирди
Муҳтасар қилиб айтганда Мудофаа вазирлиги жамоаси ва полигони шундайин нуфузли мусобақани кутиб олишга тайёр. Энди фақат ғолиб бўлиш қолди. Омад!
Изоҳ (0)