ЎзА Навоийнинг Кармана туманида жойлашган тарихий обидалар вайрон бўлаётгани ҳақида «Қулаётган сарой ёхуд олтин васвасасида олиб кетилган Амир тахти ва талон-торож қилинаётган тарихий мерос» номли мақола чоп этди. Унда Бухоро амирлиги пайтида Кармана беклигида қурилган Мирзо Чорбоғ хароб ҳолга келгани айтилган.
Мирзо Чорбоғ Амир топшириғи билан Зарафшон дарёси соҳилида 1900-1905 йилларда бунёд этилган. Сарой лойиҳаси Амирнинг шахсий архитектори Хўжа Абдураҳим томонидан тайёрланган. Қурилишга машҳур ганчкор уста Ширин раҳбарлик қилган.
Аммо бугунги кунда мутасаддиларнинг бепарволиги оқибатида мазкур тарихий обида қулаб бормоқда. Саройнинг муҳофаза деворлари ўрнатилмаган. Сарой ўртасидаги ҳовуз ахлат ва ҳайвон суяклари билан тўлдирилган. Қудуқ эса кўмиб ташланган.
Қайд этилишича, сарой асосан ёғоч ва ғиштдан тикланган. 2019 йил апрель ойида тўрт ой давомида қийшайиб турган ёғоч синчли саройнинг кутиш зали пойдевори қулаган. Қулаган жойда фақатгина миллий нақш бўлаклари қолган. Мустаҳкам ёғочлар маҳаллий аҳоли томонидан талон-торож қилинган.
Қимматбаҳо ёнғоқ ва кедр дарахтидан ишлаган сарой эшиклари эса ўғирлаб кетилган. Ҳозирда фақат 1900 йилларни эслатиб турган эшикнинг ошиқ-мошиқлари ва халқ тилида айтганда мусулмон ғиштлар қолган, холос. Бу ердаги тахт олтин васвасасида ўғирлаб кетилган, тахт турган жой эса кавланган.
Изоҳ (0)