Тошкент вилоятидаги сайёр қабулда 300 дан зиёд мурожаатнинг 64 таси жойида ҳал этилди

Тошкент вилоятида Президент Администрацияси масъуллари иштирокида сайёр қабул ўтказилди. Бу ҳақда Президент халқ қабулхонаси матбуот хизмати хабар берди.

Унда Олий суд, Бош прокуратура, Ички ишлар вазирлиги масъул ходимлари, Тошкент вилоятидаги секторлар раҳбарлари, вилоятдаги барча бошқарма ва ташкилот мутасаддилари мурожаатчиларнинг ариза, шикоят ва таклифларини кўриб чиққан.

Сайёр қабул якунида жами келиб тушган 300 дан зиёд мурожаатнинг 64 таси жойида ҳал этилган, қўшимча ўрганиш талаб этиладиган 189 та мурожаатнинг кўриб чиқилиши назоратга олинган, 51 та мурожаат бўйича ҳуқуқий маслаҳат ва тушунтиришлар берилган.

Хусусан, оҳангаронлик Наргиза Сулаймонова ўзи яшаётган «Тараққиёт» маҳалласи йўллари таъмирталаблигидан шикоят қилган. Айтилишича, ўтган йили бу ишлар бошланиб, сўнг чала қолган. Ҳудуд аҳолиси шу ишларга кўмаклашиш учун 2018 йили 170 минг сўмдан пул йиғиб берган, бу йил ҳам йўл таъмири аҳоли мажбуриятига тушган. Мурожаатдан сўнг айни ҳудуднинг йўллари ҳомий томонидан таъмирланадиган бўлган.

Олмалиқ шаҳрида ижарада яшайдиган Хуршида Рустамова 2-гуруҳ ногирони бўлган 1992 йилда туғилган ўғлини даволатишга ёрдам сўраган. Унинг муаммоси шу ернинг ўзида ўрганилиб, ҳал қилинган.