Германия канцлери Ангела Меркель соғлиғи сабабли истеъфога чиқиш нияти йўқлигини билдирган. Reuters’нинг хабар беришича, бу ҳақда федерал канцлерлик раҳбари Хелге Браун маълум қилган.
Унинг сўзларига кўра, Меркель ўзини яхши сезяпти ва ўз лавозимида ваколат муддати тугагунга қадар 2021 йилгача қолишга тайёрлигини айтган. «У номзод сифатида 2017 йилда тўрт йил муддатга сайланган, аммо олдимизда турган мақсадлар сабабли биз бу муддатни охирига етказишимиз зарур», — деб таъкидлаган Браун.
Меркель биринчи марта 18 июнда Украина президенти Владимир Зеленский билан учрашганда ўзини ғалати тутган. Унинг ёмон ҳолатга тушишига ўта иссиқ об-ҳаво сабаб бўлган, дея тахмин қилинган. Берлинда учрашув пайти ҳарорат 30 даража иссиқ эди.
Иккинчи марта шундай ҳолат 27 июнь куни Германия президенти Франк-Валтер билан учрашувида содир бўлган. Учинчиси эса 10 июлда Финландия бош вазири Антти Ринне билан учрашуви чоғида кузатилган.
Меркель 17 июлда 65 ёшни қарши олди. 2018 йилнинг кузида «Христиан-демократик иттифоқ» раислигидан кетган.
Изоҳ (0)