Germaniya kansleri Angela Merkel sog‘lig‘i sababli iste’foga chiqish niyati yo‘qligini bildirgan. Reuters’ning xabar berishicha, bu haqda federal kanslerlik rahbari Xelge Braun ma’lum qilgan.
Uning so‘zlariga ko‘ra, Merkel o‘zini yaxshi sezyapti va o‘z lavozimida vakolat muddati tugagunga qadar 2021-yilgacha qolishga tayyorligini aytgan. “U nomzod sifatida 2017-yilda to‘rt yil muddatga saylangan, ammo oldimizda turgan maqsadlar sababli biz bu muddatni oxiriga yetkazishimiz zarur”, — deb ta’kidlagan Braun.
Merkel birinchi marta 18-iyunda Ukraina prezidenti Vladimir Zelenskiy bilan uchrashganda o‘zini g‘alati tutgan. Uning yomon holatga tushishiga o‘ta issiq ob-havo sabab bo‘lgan, deya taxmin qilingan. Berlinda uchrashuv payti harorat 30 daraja issiq edi.
Ikkinchi marta shunday holat 27-iyun kuni Germaniya prezidenti Frank-Valter bilan uchrashuvida sodir bo‘lgan. Uchinchisi esa 10-iyulda Finlandiya bosh vaziri Antti Rinne bilan uchrashuvi chog‘ida kuzatilgan.
Merkel 17-iyulda 65 yoshni qarshi oldi. 2018-yilning kuzida “Xristian-demokratik ittifoq” raisligidan ketgan.
Izoh (0)