Бугун, 4 июль куни Жиззах вилоятида жойлашган «Фориш» тоғ полигонида замонавий услубда барпо этилган «Халқаро армия ўйинлари майдони»да мусобақанинг тантанали очилиш маросими бўлиб ўтди. Бу ҳақда Мудофаа вазирлиги Ахборот ва оммавий коммуникациялар департаменти «Дарё»га маълум қилди.
БТР-70, БМД ва БМП жанговар машиналар экипажидан иборат 12 та жамоа ушбу майдонда сувли тўсиқ, йўлакли кўприк, манёвр қилиш ҳудуди, баландлиги 6,7 метр бўлган қўрғон, танкка қарши ҳандақлар, портловчи мина тўсиқлари, қияли тепаликлардан ўтишади ҳамда 800 метр масофада пайдо бўлувчи нишонларни мўлжалга олиш шартларни бажаради.
Очилиш маросимидан сўнг, дастлаб БТР-70 жанговар машиналари экипажлари биринчилик сари ўзаро кураш олиб борди. Бугуннинг ўзида Шимолий-ғарбий, Тошкент ва Шарқий ҳарбий округларнинг БТР-70 экипаж жамоалари ўз маҳоратларини намойиш этди.
Тошкент ҳарбий округи жамоаси 6 километр масофада жойлашган барча шартларни 12:20 дақиқада бажариб, энг яхши натижани қайд этди. Ҳали олдинда яна БТР-70, БМД ва БМП экипажлари жамоалари мусобақага киришади.
Мудофаа вазирлиги миқиёсида ўтказилаётган мазкур мусобақа 7 июлга қадар давом этади. Ғолиб ва совриндорларга қимматбаҳо совғалар, малака тоифани бир поғона кўтариш, Ўзбекистонда ишлаб чиқарилган енгил автомобиллар сотиб олишга имтиёзли кредитлар ажратиш белгиланган.
Изоҳ (0)