27 июнь — Матбуот ва оммавий ахборот воситалари ходимлари куни муносабати билан Бухоро вилояти ҳокими томонидан тантанага келган 300 журналистнинг ҳар бирига эсдалик совға сифатида замонавий қўл телефонлари берилди.
Бухоро вилояти ҳокими Ўктам Барноев табрик сўзида радио-телевидение, босма нашрлардан ташқари, ижтимоий сайтларда фаолият юритаётган журналистлар заҳмати билан вилоятда амалга оширилаётган ислоҳот ва янгиланишлардан аҳоли ўз вақтида мунтазам хабардор бўлиб бораётгани, уларнинг ижтимоий муаммоларни ҳал этишда жонбозлик кўрсатиб келаётганини алоҳида таъкидлади.
Бухоро шаҳридаги «Руди Зар» меҳмонхонасида бўлиб ўтган ушбу тантанада миллий журналистика соҳасини ривожлантиришга катта ҳисса қўшган, мамлакат ва жамият тараққиёти йўлида фидоийлик кўрсатиб келаётган бир гуруҳ оммавий ахборот воситалари ходимлари ҳамда ижодий жамоалар вакиллари иштирок этди.
— 20 га яқин журналистлар Халқ депутатлари Бухоро вилояти Кенгаши томонидан тақдирланди. Бундан ташқари, вилоят телерадиокомпанияси ва «Бухоронома» газеталари таҳририятларига компьютерлар жамланмаси, ҳар бир ижодий ходимга планшетлар топширилди. Туман, шаҳар ҳокимликлари муассислигидаги нашрлар ҳам замонавий техник воситаларга эга бўлишди. Хусусий ОАВ ходимлари ҳам эътибордан четда қолмади, — деди вилоят ҳокими ҳокимлиги матбуот хизмати раҳбари Олим Жўраев.
Тадбирда «Дарё»нинг Бухоро вилоятидаги мухбири Лайло Ҳайитова ҳам тақдирланди.
Изоҳ (0)