Жиззах шаҳрида яшовчи Тожиқулов Юрий (исми-шарифи ўзгартирилган) укаси Я.Тожиқулов билан бирга спиртли ичимликдан маст ҳолда Жиззах шаҳар Иттифоқ маҳалласидаги «Даная» номли озиқ-овқат ҳамда спиртли ичимликлар савдо дўкони олдида фуқаро Ж.Ёқубова (исми шарифи ўзгартирилган) ва Л.Уткина (исми-шарифи ўзгатирилган) билан жамоат тартибини бузиб, майда безорилик ҳаракатларини содир этган. Тожиқулов Юрий муқаддам ИИБ ходимининг қонуний фаолиятига фаол қаршилик кўрсатгани сабабли 2018 йилнинг ўзида икки марта судланиб, жазо муддатини ўтаётган бўлган.
Жиноят ишлари бўйича Жиззах шаҳар судининг хабарига кўра, воқеа 2019 йил 3 апрель куни тунги соат 22:20 ларда содир бўлган.
Шу ҳудудга тунги хизмат вазифасини олиб бораётган Жиззах вилоят ИИБ ППХ ва ЖТСБ ходими Ч.Маликов (исми-шарифи ўзгартирилган) ва Й.Данишев (исми-шарифи ўзгартирилган) уларни ажратиб, воқеага аниқлик киритиш мақсадида, Ю.Тожиқуловни ўзининг Nexia русумли хизмат машинасига ўтказмоқчи бўлганида Ю.Тожиқулов машинанинг орқа ўнг ойнасини синдириб, ИИБ ходими Ч.Маликовнинг қонуний фаолиятига қаршилик кўрсатиб, қасддан юзига мушт туширган.
Судга тиббиёт экспертизаси хулосасига кўра, Ч.Маликовнинг тан жароҳати «ўнг кўз юқори ва пастки қовоқда қонталаш, юқори лаб соҳасидаги лат яраси ва юмшоқ тўқималар лат ейиши» деб баҳоланиб, оғирлик даражаси бўйича соғлиқнинг қисқа муддатга бузилишига олиб келмаган енгил тан жароҳати деб топилган.
Жиноят ишлари бўйича Жиззах шаҳар судининг 2019 йил 24 июнь кунги ҳукми билан Ю.Тожиқулов хатти-ҳаракати билан Жиноят Кодексининг 219-моддаси 1-қисмида назарда тутилган жиноятни содир этганликда айбдор деб топилиб, ЖКнинг 60-моддасига асосан 1 йил муддатга озодликдан маҳрум қилиш жазоси тайинланган.
Жазо қаттиқ тартибли калонияларда ўташлик ҳамда Ю.Тожиқуловдан Жиззах вилоят ИИБ ППХ ва ЖТСБ фойдасига 157 719 сўм моддий зарар ундириш белгиланди.
Изоҳ (0)