Бош прокурор ўринбосари Эркин Йўлдошев журналистлар билан 17 июнь куни бўлиб ўтган очиқ мулоқот чоғида Саид-Абдулазиз Юсуповнинг рафиқаси ва адвокатининг гаплари билан прокуратура баёнотларидаги тафовутга изоҳ бериб ўтди. Бу ҳақда «Дарё» мухбири Мусулмонбек Иброҳимов хабар бермоқда.
Саид-Абдулазиз Юсупов жуда кўп миқдорда фирибгарлик содир этганликда гумон қилиниб 10 май куни ушланган, ДХХ Тергов бошқармаси томонидан жиноят ишида айбланувчи тариқасида иштирок этишга жалб қилиниб, 12 май куни унга нисбатан қамоқ тарзидаги эҳтиёт чораси қўлланилган эди.
У қўлга олингандан сўнг, Юсуповнинг рафиқаси бир қатор ОАВларга интервью бериб, эрининг оғир касаллиги борлигини, шу туфайли тиббий ёрдамга муҳтожлигини маълум қилган эди. Бунга жавобан Бош прокуратура Юсуповнинг саломатлиги ҳолати шифокорлар томонидан текширилиб, уни қамоқда сақланишига тўсқинлик қилувчи аломатлар аниқланмаганини маълум қилганди.
Кейинроқ, Юсуповнинг онаси Ж.Бакаева 7 июнь куни Бош прокуратура раҳбарияти қабулида бўлиб, тергов жараёнида ўғли жисмоний қийноққа солинаётганлиги ҳақида мурожаат қилган ва ўғлини унинг ҳимоячиси иштирокида тиббий кўрикдан ўтказишни сўраган (бундан аввал Юсупов ўз адвокатига уни ‘уравериб, ичини тўкиб ташлашганиъни айтгани ҳақида хабарлар чиққанди).
8 июнда Бош прокуратура томонидан адвокат А.Шоймардонов ва тергов устидан назорат олиб борувчи прокурор Д.Раҳматуллаев иштирокида мутахассис-шифокорларни жалб қилган ҳолда айбланувчи Саид-Абдулазиз Юсупов тиббий кўрикдан ўтказилганда унинг танасида бирор-бир тан жароҳати ёки қийноқ аломатлари аниқланмаган.
Бош прокурор ўринбосари Эркин Йўлдошевнинг айтишича, ҳар қандай жиноят ишида айбланувчи томон ноқонуний тергов ҳолатлари бўйича шикоят қилиши мумкин. Бу мурожаатлар текширилади ва баҳо берилади:
Ҳар қандай жиноят иши бўйича ҳимоячи, айбланувчи, унинг қариндошлари ноқонуний тергов усуллари қўлланилгани ҳақида ариза билан шикоят қилиши мумкинлиги, айбсизлиги ҳақида важлар келтириши мумкин. Бу мурожаатлар қонунда қатъий белгилаб қўйилган процессуал тартибда текширилади ва баҳо берилади.Аввалроқ, Саид-Абдулазиз Юсуповга нисбатан у раҳбарлик қилган Ўзбекистон босма оммавий ахборот воситалари ва ахборот агентликларини қўллаб-қувватлаш ва ривожлантириш жамоат фондининг 270 миллион сўм пул маблағларини ўзлаштириш айби ҳам илгари сурилаётгани маълум қилинган эди.Жиноят иши бўйича ҳақиқий ҳолат тарафларнинг важлари ёки баёнотларига, ёки бўлмаса тергов органининг субъектив фикрига қараб баҳоланмайди. Бунинг учун далил ва исбот керак. Саид-Абдулазиз Юсуповнинг қариндошлари ва прокуратура баёнотлари ўртасидаги фарқлар жиноят ишини тугатиш учун асос бўлмайди.
Баёнот фаразлар эмас, объектив текширувнинг расмий натижалари, далиллар асосида берилган. Терговда Юсуповнинг жиноий фаолиятига алоқадор бўлиши мумкин бўлган барча ҳолатлар батафсил текширилади. Бу тергов олиб бориш тартибини белгиловчи процессуал нормалар талабидир.
Эркин Йўлдошев, бош прокурор ўринбосари
Изоҳ (0)