Самарқанддаги боғчада портлаш юзасидан вилоят ФВБ Ёнғин хавфсизлиги бошқармаси маълумот берди

13 июнь куни тахминан соат 12:30 ларда Самарқанд тумани, Андижоний маҳалласида жойлашган 30-сонли мактабгача таълим муассасаси ошхонасида маиший газ баллони портлаши оқибатида ёнғин вужудга келган. Самарқанд вилоят ФВБ ЁХБ мазкур ҳолатга ўз муносабатини билдирди.

«Ҳозирги кунда республикамизнинг айрим интернет тармоқларида ўрганилмасдан туриб, нотўғри маълумотларни чиқарилиши натижасида фуқаролар ўртасида турли фикрларни пайдо бўлишига сабаб бўлмоқда. Хусусан, Самарқанд туман Андижоний маҳалласида жойлашган 30-сон мактабгача таълим муассасасида 13 июнь куни соат 11:31 ларда муассасасига қарашли ошхонанинг 20 квадрат метри ёнганлиги, натижада портлаш содир бўлганлиги тўғрисида хабарлар тарқалди. Ҳатто портлаш оқибатида фуқаролар тан жароҳати олганлиги тўғрисида ҳам ёлғон маълумотлар тарқалди. Аслида ёнғин содир бўлган боғча ошхона биносининг 18 квадрат метр шифти, девор қисмлари ва ошхона буюмлари ёнган. Муассаса ошхонасида ўсимлик ёғи меъёридан ортиқ қизиб кетиши натижасида ёнғин содир бўлганлигини тахмин қилинмоқда», — дейилади вилоят ФВБ ЁХБ матбуот хизмати хабарида.

Ёнғиндан тан жароҳат олганлар ва ҳалок бўлганлар мавжуд эмас. Ёнғинни ўчиришда Самарқанд тумани 11-Касбийлашган ёнғин ўчириш қутқарув қисмидан 4-жанговар машинаси жалб этилган. Ёнғиннни бартараф этиш жараёнида 180 квадратметр ҳажмидаги бино ва материал бойликлар қутқариб қолинган. Ёнғин содир бўлган жойда ҳеч бир ишчи хизматчи ва тарбияланувчи билан боғлиқ бахтсиз ҳодиса рўй бермаган.

ФВБ ЁХБнинг маълум қилишича, ҳозирги кунда ёнғин содир бўлган жойдан 30-сон мактабгача таълим муассасасига қарашли ошхона биносининг ҳар жойидан олинган кул, ёғоч қолдиқлари, электр симлари намунасидан ёнғин сабабини аниқлаш мақсадида Ўзбекистон Республикаси Адлия Вазирлиги қошидаги Х.Сулаймонова номидаги Республика суд экспертизасига юборилган.

«Ушбу ҳолат юзасидан экспертиза томонидан юборилган хулосага асосида ёнғинни келиб чиқиш сабаби ҳақида қўшимча равишда маълумот берамиз», — дейилади вилоят ФВБ ЁХБ хабарида.

Аввалроқ Мактабгача таълим вазирлиги ушбу ҳодисага муносабат билдирганди.