Самарқанд тумани Андижоний маҳалласидаги 30-сонли мактабгача таълим муассасаси ошхонасида газ баллони портлагани ҳақида хабар берган эдик.
Самарқанд вилояти бўйича газ таъминоти ҳудудий филиали идорасидан «Zarnews.uz» сайтига қуйидаги далолатнома юборилди. Унда шундай дейилган:
Бизларким ушбу далолатномани тузиб имзо чекувчилар 2-сонли туманлараро газ таъминоти Самарқанд туман участкаси СУГ етакчи муҳандиси А.Вадудов, Самарқанд тумани Андижоний маҳалласига бириктирилган масъул ходим ўрнатувчи чилангар В.Хожиевлар биргаликда Андижоний маҳалласида жойлашган 30-сонли MTM мудираси Ф.Қодирова иштирокида MTMнинг дала ошхонасида 2019 йил 13 июнь куни соат 11:30 ларда келиб чиққан ёнғин сабабларини ўрганиб чиққанимизда MTM ошхонасида доғланаётган ёғдан аланга чиқиб ёнғин содир бўлганлиги сабаб бўлди. Бунинг оқибатида ишчи ходимлар ва ошхона жиҳозларига зарар етмаган. Ушбу Андижоний маҳалласида жойлашган 30-сонли мактабгача таълим муассасаси табиий газ тармоғидан 2009 йилда узилган бўлиб, MTM томонидан суюлтирилган газ баллон олиш учун мурожаат этилмаганлиги учун суюлтирилган газ билан ҳам таъминланмаган. Ёнғин натижасида ҳеч нарсага зарар етмаганлиги аниқланди.
MTM мудираси ўз тушунтириш хати орқали газ таъминоти ходимларига эътирози йўқлигини маълум қилди.
Ушбуларни тўғри деб имзо чекувчилар:
СУГ етакчи муҳандиси А.Вадудов.
Чилангар: В.Хожиев.
MTM мудираси: Ф.Қодирова.
Далолатномадан кўриниб турибдики, ушбу боғча газ тармоғидан узилган, газ таъминоти идорасига суюлтирилган газ баллон олиш учун мурожаат этилмаган. Савол туғилади, унда MTM газ баллонини қаердан оляпти?
Изоҳ (0)