Samarqand tumani Andijoniy mahallasidagi 30-sonli maktabgacha ta’lim muassasasi oshxonasida gaz balloni portlagani haqida xabar bergan edik.
Samarqand viloyati bo‘yicha gaz ta’minoti hududiy filiali idorasidan “Zarnews.uz” saytiga quyidagi dalolatnoma yuborildi. Unda shunday deyilgan:
Bizlarkim ushbu dalolatnomani tuzib imzo chekuvchilar 2-sonli tumanlararo gaz ta’minoti Samarqand tuman uchastkasi SUG yetakchi muhandisi A.Vadudov, Samarqand tumani Andijoniy mahallasiga biriktirilgan mas’ul xodim o‘rnatuvchi chilangar V.Xojiyevlar birgalikda Andijoniy mahallasida joylashgan 30-sonli MTM mudirasi F.Qodirova ishtirokida MTMning dala oshxonasida 2019-yil 13-iyun kuni soat 11:30 larda kelib chiqqan yong‘in sabablarini o‘rganib chiqqanimizda MTM oshxonasida dog‘lanayotgan yog‘dan alanga chiqib yong‘in sodir bo‘lganligi sabab bo‘ldi. Buning oqibatida ishchi xodimlar va oshxona jihozlariga zarar yetmagan. Ushbu Andijoniy mahallasida joylashgan 30-sonli maktabgacha ta’lim muassasasi tabiiy gaz tarmog‘idan 2009-yilda uzilgan bo‘lib, MTM tomonidan suyultirilgan gaz ballon olish uchun murojaat etilmaganligi uchun suyultirilgan gaz bilan ham ta’minlanmagan. Yong‘in natijasida hech narsaga zarar yetmaganligi aniqlandi.
MTM mudirasi o‘z tushuntirish xati orqali gaz ta’minoti xodimlariga e’tirozi yo‘qligini ma’lum qildi.
Ushbularni to‘g‘ri deb imzo chekuvchilar:
SUG yetakchi muhandisi A.Vadudov.
Chilangar: V.Xojiyev.
MTM mudirasi: F.Qodirova.
Dalolatnomadan ko‘rinib turibdiki, ushbu bog‘cha gaz tarmog‘idan uzilgan, gaz ta’minoti idorasiga suyultirilgan gaz ballon olish uchun murojaat etilmagan. Savol tug‘iladi, unda MTM gaz ballonini qayerdan olyapti?
Izoh (0)