Аввал хабар берганимиздек, Наманган шаҳрида Корея—Ўзбекистон бизнес форуми бўлиб ўтди. Бу ҳақда «Дарё»га вилоят ҳокимлиги ахборот хизмати маълум қилди.
Форумда 40 дан ортиқ компания вакилларидан иборат Жанубий Корея делегацияси ҳамда наманганлик мутасаддилар ва ишбилармон доиралар иштирок этди.
Тадбирни вилоят ҳокими Хайрулло Бозоров ва Корея—Ўзбекистон бизнес маркази раиси, корейс делегацияси раҳбари Ким Чанг Кеон бошлаб берди.
Вилоят ҳокимининг биринчи ўринбосари Аюбхон Камолов меҳмонлар учун Наманганнинг иқтисодий ва инвестицион салоҳияти ҳақида тақдимот ўтказди.
Ўзбекистоннинг Корея Республикасидаги Фавқулодда ва мухтор элчиси Виталий Фен ўз чиқишида кореялик ишбилармонларга Ўзбекистонда, хусусан, Наманганда бизнес юритишнинг қулайликлари ҳақида тўхталди.
Меҳмонлардан «М2М» компанияси раҳбари Чо Пил Же ҳамда Himchan hospital бош директори Чо Хюн Жун сўз олиб, режалаштираётган лойиҳалари ҳақида маълумот берди.
Форумнинг мантиқий давоми сифатида икки давлат вакиллари ўртасида В2В ва B2G учрашувлари ташкил этилди. Ушбу музокаралар натижасида умумий қиймати 14 миллион доллар бўлган 4 та инвестицион келишув имзолашга эришилди.
Жумладан, Чортоқ туманида қиймати 5 миллион доллар бўлган мева-сабзавот маҳсулотларини қайта ишлаш, Тўрақўрғон туманида умумий қиймати 4 миллион доллар бўлган қурилиш материаллари ишлаб чиқариш йўналишида 2 та лойиҳа ҳамда Уйчи туманида 5 миллион долларлик вино ишлаб чиқариш лойиҳаси бўйича кореялик ишбилармонлар билан ҳамкорлик ҳақида келишиб олинди.
Корея делегацияси аъзолари вилоятдаги «Chust textile», «Art Soft Tex» ва «Lyuks Plyus Servis» корхоналарида бўлди. Наманган шаҳридаги «Орзу» кичик саноат зонаси фаолияти билан, шунингдек, Наманган шаҳрида барпо этилаётган «Афсоналар водийси» тематик парки ҳамда Тўрақўрғон туманидаги қурилаётган «Hyundai Motor Uz Namangan» қўшма корхонаси қурилиш жараёнлари билан танишди.
Изоҳ (0)