Солиқларни ўз вақтида тўлаб, қонун доирасида фаолият юритаётган корхоналар ҳеч қачон текширилмайди. Бу ҳақда Давлат солиқ қўмитаси раисининг биринчи ўринбосари Мубин Мирзаев журналистлар билан 12 июнь куни Ахборот ва оммавий коммуникациялар агентлигида бўлиб ўтган мулоқотда айтиб ўтди, дея хабар бермоқда «Дарё» мухбири Мусулмонбек Иброҳимов.
Анжуманда Мубин Мирзаев қўмита ташкилий тузилмасида солиқ тўловчиларни сегментларга бўлиб ўргунувчи янги Риск-анализ бошқармаси ташкил этилганини маълум қилди. Янги бошқарма солиқ тўловчиларни уч тоифага бўлган ҳолда ўрганади.
«Авваллари мувофиқлаштирувчи кенгашга рўйхат киритиб, корхоналарни ҳар уч ёки беш йилда текшириш керак, деган режа қилинган. Эндиликда бу амалиётдан воз кечиб, солиқ нормаларига риоя этилишига қараб, корхоналарни тоифаларга ажратиб ишлаш йўлга қўйилмоқда. Шундай тоифалардан бирини ‘Яшил чироқ’ деб номладик. Ушбу гуруҳга кирган корхоналар ҳеч қачон текширилмайди. Бу тоифага солиқларни ўз вақтида тўловчи, қонунчиликка риоя қилиб ишловчи корхоналар киради», — деди Мирзаев
Ўринбосарнинг айтишича, солиқ тўловларини тўлаш истаги бор, лекин баъзи меъёрларга тушунмаётган солиқ тўловчилар эса «Сариқ чироқ» гуруҳига мансуб бўлади. «Айрим корхоналарнинг солиқ тўлашга хоҳиши бор. Тўловларни амалга оширишни ё тушунмайди, ёки бунга билими етмайди. Айтайлик, солиқ тўлашда баъзи бир камчиликларга йўл қўйган. Биз уларни тўғрилаб, тушунтириш берган ҳолда, ‘Яшил чироқ’ гуруҳига ўтказишга ҳаракат қиламиз», — деди қўмита раиси биринчи ўринбосари.
Мубин Мирзаев учунчи тоифага кирувчи солиқ тўловчиларга ҳам тўхталиб ўтди: «Айрим корхоналар бор — солиқ тизимини ва ўз мажбуриятларини яхши билади, лекин солиқ тўлашга хоҳиши йўқ. Солиқ тўлашдан бош тортади, қонучиликни бузади. Бундай корхоналар ‘Қизил чироқ’ гуруҳига киритилади. ‘Қизил чироқ’га тушган корхоналар билан алоҳида ишлаб, назорат тадбирларини олиб борамиз».
Таъкидланишича, тоифалар солиқ тўловчиларнинг маълумотлари қанчалик очиқ-ойдин тақдим этилишига қараб белгиланади. Агар солиқ тўловчилар барча операцияларни тўлиқ кўрсатиб, тўғри ишласа, бундай корхоналар, Мубин Мирзаевнинг айтишича, ҳеч қачон текширилмайди — қўмита вакили бунга кафолат беришини маълум қилди.
Изоҳ (0)