«Миллий банк» Марғилон шаҳар филиалида мижозларнинг кредит қарздорлиги омонатчиларнинг маблағлари ҳисобидан қоплаб келаётганлиги фош этилди. Бу ҳақда ЎзА хабар берди.
Филиал бошқарувчиси А. Мадвалиев ва ходимлар Ш. Раҳимов, Э. Усмонова ва И. Раҳматуллаева фуқаролар ишониб топширган маблағларни банкдан кредит олган бошқа мижозларнинг кредитдан бўлган қарздорликларини қоплашга йўналтириб, ушбу маблағларни растрата қилиш йўли билан талон-торож қилган.
Хусусан, А.Кавлановнинг 49 миллион сўм маблағини касса мудири Ш.Раҳимов қабул қилиб олиб, унга сохта омонат дафтарчаси ва ҳисобварақ расмийлаштирган, ўзига бириктирилган дастурий тизимига қайд этмаган. Мижозга топширган пул маблағлари унинг омонат ҳисоб рақамига кирим бўлганлигини билдириб, топширилган пул маблағлари ҳисобидан ҳар ойнинг белгиланган санасида А.Кавлановга омонат фоизларини ўз ҳисобидан бериб, бу ҳақда омонат дафтарчаси ва ҳисобварағига сохта ёзувларни қайд этиб келган. Мазкур филиалнинг мижозлари бўлган бир қатор корхоналарнинг кредит тўловлари шу каби айрим омонатчиларнинг банкка топширган пул маблағлари ҳисобидан қоплаб берилган.
«Ўзмиллийбанк» бош офиси раисининг фармойиши асосида банкнинг Марғилон филиалида ўтказилган хизмат текширувида 5 та ҳолатда мижозлар ҳисоб рақамига жами 116 миллион 732 минг 500 сўм кирим қилинмагани аниқланди.
Бундан ташқари, «Миллийбанк» Марғилон шаҳар филиалининг жисмоний шахсларга чет эл валютасини сотиш бўйича конверсион операциялар бўлими бошлиғи вазифасида ишлаган Э.Усманова, филиалнинг айирбошлаш амалиётлари шў’баси кассир-назоратчиси вазифасида ишлаган И.Раҳматуллаева ҳам ўзгаларнинг ҳақига хиёнат қилди. Улар «Золотая корона» халқаро пул ўтказмалари тизими орқали 11 нафар шахс номига келган чет эл валютасини мижозлар банкдан олиб кетишганидан сўнг улар номидан маълумотлар киритиб, 3 минг 260 долларни талон-тарож қилган.
Жиноят ишлари бўйича Марғилон шаҳар суди томонидан мазкур жиноят иши кўриб чиқилиб, уларга тегишли жазо тайинланди. Жабрланувчиларга етказилган моддий зарар эса қопланди.
Изоҳ (0)