Кучли Mac Pro, қора режим ва яхшиланган iOS: Apple 2019 йил янгиликларини тақдим этди

3 июнь куни Калифорния штатининг Сан-Хосе шаҳрида Apple томонидан дастурчилар учун ҳар йили ташкиллаштирилиб келинадиган WWDC 2019 анжумани бўлиб ўтди. Компания бирданига бир нечта янги қурилмаларини тақдим этди, деб хабар беради Forum Daily.

Янги Mac Pro

Apple металл корпусга ва кутилмаган қувватга эга янги Mac Pro’ни тақдим этди. Унинг ичига 28 ядроли Intel Xeon, 1,5 терабайт тезкор хотира (ҳа, айнан тезкор хотира) ҳамда дунёдаги энг кучли Radeon Pro Vega II Duo видеокартаси ўрнатилган.

Янги Маc Pro жорий йилнинг кузида 5 999 доллардан сотувга чиқади. Мониторини 4 999 долларга харид қилиш мумкин бўлади.

Мустақил дастурга эга янги watchOS

Компания смартфонга уланмасдан туриб ишлай оладиган соатлар учун янгиланган watchOS’ни тақдим этди. Дастурни алоҳида дўконлардан кўчириб олиш мумкин. Бундан ташқари Apple соатга будилник, овоз ёзиб олиш, калкулятор, аудикитобларни ўқиш каби функцияларни ҳам қўшган.

Apple расман iOS 13’ни — ўзининг мобил қурилмалари учун янги операцион тизимни намойиш этди. Унинг ўзига хослиги — қора фон бўлиб, кечаси телефондан фойдаланишда қўл келади. Шунингдек, у икки баробар тез ишлайди. Face ID учун аввалгидан 30 фоиз камроқ вақт сарфланади.

Бундан ташқари анжуман давомида iPad’лар учун алоҳида iOS ҳам тақдим этилиб, iTunes сервисининг ёпилиши маълум қилинди.