«Давлат-хусусий шериклик тўғрисида»ги қонунда умумий қиймати 10 миллион доллардан юқори бўлган давлат-хусусий шериклик лойиҳалари Вазирлар Маҳкамаси қарори билан амалга оширилиши белгилаб қўйилган. Давлат-хусусий шерикликни ривожлантириш агентлиги бошқарма бошлиғи Шуҳрат Жўраевнинг маълум қилишича, бундай норма ҳудудий ҳокимликларнинг хусусий шерикка нисбатан таъсирини камайтириш учун киритилган.
Ўзбекистон Ахборот ва оммавий коммуникациялар агентлигида 3 июнь куни Олий Мажлис Қонунчилик палатаси қўмита раиси Илҳом Абдуллаев, депутат Шуҳрат Тўхтабоев ва Давлат-хусусий шерикликни ривожлантириш агентлиги бошқарма бошлиғи Шуҳрат Жўраев иштирокида журналистлар билан мулоқот бўлиб ўтди. «Дарё» мухбири Мусулмонбек Иброҳимовнинг хабар беришича, унда 2019 йил 10 майда қабул қилинган «Давлат-хусусий шериклик тўғрисида»ги қонуннинг аҳамияти, асосий мақсадлари ҳақида маълумот берилган.
Шуҳрат Жўраевнинг таъкидлашича, қиймати 10 миллион доллардан ортиқ бўлган давлат-хусусий шериклик лойиҳаларининг Вазирлар Маҳкамаси қарори билан амалга оширилиши билан боғлиқ механизм қуйи ижро органларининг хусусий шерикка нисбатан таъсирини камайтиради.
«Лойиҳа учун вилоятда ер ажратиш масаласи тўхтаб турибди, деб ҳисоблайлик.Агар шериклик масаласи ҳокимликка қолганида, шериги ҳам, ‘жаллоди’ ҳам ҳокимликнинг ўзи бўлиб қоларди. Шунинг учун, масалани ҳал қилиш нуқтаи назаридан, депутатлар ва Президент администрацияси маслаҳати билан, қарор қабул қилиш ваколати Вазирлар Маҳкамасига юклатилди», — деди агентлик вакили.
«Давлат-хусусий шериклик тўғрисида»ги қонунда хусусий шерик тендер ёки тўғридан-тўғри музокаралар асосида саралаб олиниши назарда тутилган. Бунда бир босқичли ва икки босқичли тендер ўтказиш тартиби белгиланган.
Умумий қиймати 1 миллион долларга қадар бўлган давлат-хусусий шериклик лойиҳалари бўйича бир босқичли тендер ўтказилади. Қиймати 1 миллион доллардан ортиқ бўлган лойиҳалар бўйича эса икки босқичли тендер ўтказилади — у дастлабки малакани аниқлаш ва тендер ғолибини саралаш босқичларини ўз ичига олади.
Изоҳ (0)