Ўзбекистон Президенти Шавкат Мирзиёев 1 июнь куни Тошкент вилояти бўйлаб сафари давомида Оҳангарон туманидаги Building Innovation корхонасида бўлди. Бу ҳақда Президент матбуот хизмати хабар бермоқда.
Германия, Австрия, Греция, Испания ва Япониядан келтирилган ускуналар ўрнатилган корхона йилига 112 миллиондан зиёд пардозбоп ғишт ишлаб чиқариш, 3 миллион долларлик экспорт қилиш қувватига эга. Энергия тежайдиган ускуналар қўлланилгани, хом ашё туманнинг ўзидан олиниши туфайли маҳсулот нархи нисбатан арзон бўлади. 250 нафар аҳоли иш билан таъминланади.
«Корхона маҳсулот ҳажми ва сифати бўйича Марказий Осиёда етакчиликка даъвогарлик қилмоқда. Кейинги босқичда керамик блоклар, панеллар ишлаб чиқариш режалаштирилган», — дейилади Президент матбуот хизмати ахборотида.
Президентимиз корхона қувватлари, маҳсулот намуналарини кўздан кечирди. Корхона раҳбарига қурилиш материаллари турларини кўпайтириш юзасидан тавсиялар берди. Шу ерда Тошкент вилоятида қурилиш ва тўқимачилик саноатини ривожлантириш, чармни қайта ишлашга доир лойиҳалар тақдимоти ўтказилди.
Россиянинг «Евротцемент груп» холдинги билан ҳамкорликда Оҳангарон цемент заводида амалга ошириладиган лойиҳа шулардан бири. Қиймати 160 миллион долларлик мазкур лойиҳа йилига 17 миллион долларлик маҳсулот экпорт қилиш, 200 та иш ўрни яратиш имконини беради.
Изоҳ (0)