Давлат божхона қўмитасида 29 май куни «Божхона органларида жорий этилган ахборот-коммуникация технологиялари ва интерактив хизматларнинг тадбиркорлик субъэктлари фаолиятидаги аҳамияти» мавзусида матбуот анжумани ўтказилди.
Қўмита мабуот хизматининг хабар беришича, унда журналистлар, матбуот ва оммавий ахборот воситалари ходимлари ҳамда бир қатор тадбиркорллик субъектлари вакиллари иштирок этди.
Матбуот анжуманида маълум қилинишича, Давлат божхона қўмитаси томонидан келгусида «Ягона дарча», «Ваколатли иқтисодий операторлар реестри», «Интеллектуал мулк объэктларининг божхона реестри» каби 10 дан ортиқ ахборот тизимлари ҳамда «Божхона тўловлари бўйича солиштирув далолатномалари» интерактив хизматининг мобил талқини, автотранспорт воситаларини Давлат чегараси орқали ўтишда навбатларни бошқариш электрон тизимини жорий этиш устида ишлар олиб борилмоқда.
Тадбирда журналистларга давлат божхона хизмати органларини жаҳон амалиётида кенг қўлланилаётган божхона назоратининг замонавий техник воситалари билан таъминлаш борасида амалга оширилаётган чора-тадбирлар ҳақида ҳам батафсил ахборотлар берилди.
Жумладан, бугунги кунда тадбиркорлар учун экспорт-импорт операцияларида талаб этиладиган ҳужжатлар, божхона назорати ва расмийлаштируви учун сарфланадиган вақт ҳамда тадбиркорлар маблағларини тежаш мақсадида божхона органлари билан боғлиқ жараёнлар тўлиқ электрон шаклга ўтказилди. Бунинг учун юк божхона чегарасига кириб келишидан токи божхона расмийлаштируви тугаллангангунга қадар жараённи ўз ичига қамраб олган 51 та автоматлаштирилган ахборот тизимлари ва 14 та электрон интерактив хизматлар жорий этилган.
Ҳозирда республикадаги чегара ва темир йўл божхона постлари орқали ҳаракатланаётган автотранспорт воситалари ҳамда темир йўл составларини божхона назоратидан ўтказиш вақтини қисқартириш мақсадида республикамиз божхона постлари босқичма – босқич инспексион кўрик мажмуалари билан таъминлаб келинмоқда ва бугунги кунда 17 та божхона постлари 19 комплект инспексион кўрик мажмуалари билан таъминланган.
Эндиликда тадбиркорлар ва ташқи иқтисодий фаолият (ТИФ) қатнашчилари божхона тўловларини банк идораларига бормасдан ва ўз офисларидан чиқмасдан туриб, қисқа вақт ичида ва қулай усулларда тўлаш имкониятлари жорий қилинди. Яъни, божхона тўловларини Click, Payme ёки Upay тўлов тизимлари орқали амалга ошириш имконияти йўлга қўйилди.
Шунингдек, тадбиркорлар ва фуқароларнинг мурожаатлари, таклифлари ва муаммоларини зудлик билан кўриб чиқилишини таъминлаш мақсадида, ДБҚ марказий аппаратида 11-08 қисқа рақамли Call-марказ ишга туширилди. Мазкур тизим орқали жорий йил давомида 300 дан ортиқ мурожаатлар келиб тушган ва уларга батафсил жавоб берилган.
Тадбиркорлик субъэктларига мева-сабзавот маҳсулотларининг экспортини амалга оширишда қулайликлар яратиш мақсадида 2019 йил 10 майдан бошлаб, Ўзбекистондан экспорт қилинган мева-сабзавот маҳсулотлари тўғрисида ДБҚ расмий-веб сайти орқали интерактив маълумотлар тақдим этиш йўлга қўйилган.
Изоҳ (0)