Клопп Почеттинога, Салоҳ эса Кейнга қарши. «Реал»нинг 1099 кун давом этган ҳукмронлигига чек қўйиладиган ЕЧЛ финали ҳақида

1 июнь оқшомида Мадриддаги «Vanda Metropolitano» стадионида Европа Чемпионлар Лигасининг янги ғолиби аниқланади. Шу билан бирга «Қироллик клуби»нинг Европада 1099 кун давом этган гегемонлигига ҳам рамзий ҳам расмий маънода якун ясалади.

Мадриддаги финал катта эҳтимол билан икки инглиз жамоасининг ўзаро ҳисоб-китоби сифатида ҳам ёдда қолади. Сўнгги йилларда Еврокубоклар борасида омади чопмаётган инглизларнинг бир йўла тўрт жамоаси 2018/19 йилги мавсумга («Манчестер Юнайтед»нинг Европа Лигасидаги ғалабасига ҳурмат сақлаган ҳолда) келиб, «қора анъана»га барҳам бера олди. Бокуда ўтган Европа Лигаси финалида Лондоннинг икки жамоаси беллашиб, омад «Челси» тарафида бўлгани ҳали кўпчиликнинг ёдидан кўтарилмагани аниқ. Бугун эса «Тоттенҳэм» ҳамда «Ливерпуль» Европанинг энг нуфузли соврини — «шалпангқулоқ» кубокнинг янги соҳиби ким бўлишини аниқлаб беради.

Келинг финал беллашувидан олдин бироз жамоаларнинг ҳал қилувчи баҳсга қадар босиб ўтган йўли ва учрашувга оид қизиқарли фактлар ҳақида суҳбатлашамиз.

«Тоттенҳэм»

Маурисио Почеттино бошлиқ «Тоттенҳэм» гуруҳ босқичидан амаллаб ўтиб олди. Жамоа гуруҳда «Барселона», ПСВ ва «Интер» жамоалари билан плей-офф йўлланмаси учун кураш олиб борди. Плей-офф йўлланмаси «шпорлар»га сўнгги турга келибгина насиб этди. «Тоттенҳэм» 6-турда «Барселона»ни сафарда енгиши керак эди. Аммо клуб дурангдан нарига ўта олмади. Бироқ параллел кечган баҳсда «Интер» ПСВни юта олмай, Лондон клубининг гуруҳдан чиқишига кўмаклашиб юборди. Почеттино жамоаси плей-оффга чиқди. «Интер» эса Европа Лигасига равона бўлди. «Тоттенҳэм» гуруҳ босқичини қандай хавотирли ўтказган бўлса, плей-офф босқичи ҳам бундан кам бўлмади. Жамоа чорак финалда Пеп Гвардиоланинг «Манчестер Сити»ни сафарда урилган гол эвазига мағлуб этиб, ярим финал йўлланмасини ўзиники қилди. ½ финал кўпчиликнинг ёдида бўлса керак. Лондондаги ўйинда «Аякс» битта тўп фарқи билан ғалаба қозонган бўлса, жавоб беллашувида Лукас Моуранинг сўнгги дақиқада киритган голи «Тоттенҳэм»ни Мадридда бўлиб ўтадиган финал иштирокчисига айлантирди.

«Ливерпуль»

«Ливерпуль» босиб ўтган йўл ҳам «Тоттенҳэм»никидан қолишмайди. Жамоа гуруҳда ПСЖ, «Наполи» ва «Црвена Звезда» билан таъбир жоиз бўлса, жанг олиб борди. Клопп шогирдлари гуруҳда сафардаги барча ўйинни бой берди. Аммо сўнгги турда ўзи учун керакли бўлган натижани қайд эта олди. «Наполи» минимал ҳисобда мағлуб этилди ва плей-офф йўлланмаси нақд қилинди. Чорак финалда мерсисайдликлар «Порту»ни қийинчиликсиз (6:1) мағлуб этди. Ярим финал эса мисоли ҳаёт-мамот жангини эслатиб юборди. «Ливерпуль» сафарда Лео Месси етакчилигидаги «Барселона»га 0:3 ҳисобида ютқазди. «Энфилд»даги жавоб беллашувида эса «қизиллар» 4:0 ҳисобида ғалаба қозониб, ўзига хос тарих яратган ҳолда Мадрид чипталарига буюртма беришди.

Иккала жамоа ҳам финалга осонликча етиб келгани йўқ. Шундай экан, финал беллашуви ҳам муросасиз курашларга бой бўлишига умид қилиб қоламиз.

Қизиқарли фактлар

1. «Тоттенҳэм» ва «Ливерпуль» ўзаро 170 марта тўқнаш келган. 79 марта «қизиллар», 48 бора эса «шпорлар»нинг қўли баланд келган. 43 марта томонлар дурангга рози бўлган. Голлар нисбати ҳам «Ливерпуль» фойдасига 266:195.
2. Жамоалар 1973 йил Еврокубоклар тарихидаги ўзларнинг илк ва сўнгги дуэлини ўтказган. УЕФА Кубогининг ярим финали доирасида «Ливерпуль» «Тоттенҳэм»ни сафарда урилган гол эвазига (1:0, 1:2) мағлуб этиб, финалга чиққанди.
3. Томонлар умуман финал доирасида фақат бир марта ўзаро дуч келган. Хусусан, 1982 йил Англия Суперкубоги доирасида «Ливерпуль» «Тоттенҳэм»ни 1:0 ҳисобида таслим этган ва совринни ўзиники қилган.
4. Бу учрашув Почеттино ва Клоппнинг ўзаро 10-тўқнашуви бўлади. Ҳозиргача Клопп жамоаси билан 4 та ғалабани қўлга киритган. Почеттино ҳисобида эса атиги битта ғалаба мавжуд. 4 та беллашувда эса дуранг қайд этилган.
5. Иккала мураббий ҳам Европа Чемпионлар Лигаси бош совринига эга чиқмаган. Улардан бир бугун бу «анъана»га барҳам беради.
6. «Тоттенҳэм» Чемпионлар Лигаси финалида илк марта ўйнайди.
7. «Ливерпуль» сафида Чемпионлар Лигасида аввал ғолиб чиққан 2 нафар футболчи бор — Старриж (2012 йил, «Челси» билан) ҳамда Шакири (2013 йил, «Бавария» билан).
8. «Тоттенҳэм»да эса бундай ўйинчи йўқ.
9. Бу Мадрид мезбонлигида ўтаётган бешинчи Чемпионлар Лигаси финалидир (1957, 1969, 1980, 2010 — барча финалларга «Сантьяго Бернабеу» мезбонлик қилган).
10. Сиссоко («Тоттенҳэм») ва Вейналдум («Ливерпуль») уч йил олдин «Ньюкасл» сафида АПЛдан Чемпионшипга тушиб кетганди, энди эса улар бир-бирига қарши Чемпионлар Лигаси финалида майдонга тушади.

Тахминий таркиблар

Финалдан олдинги фикрлар

Биз ўйиндан роҳатланишга тўлиқлигича тайёрмиз. Бир-биримизни яхши биламиз. Ўзимизга ишонамиз. Энг асосийси — ўз ишимизни яхши кайфият билан қила олишимиз. «Ливерпуль» жуда яхши жамоа. «Сити» ва «қизиллар» Англиянинг энг яхши икки жамоаси. Улар АПЛ бош соврини учун охиригача курашди, аммо Чемпионлар Лигасида ҳам қойилмақом ўйнаганини ҳам қайд этиш жоиз. Бу фантастик мураббий Юрген Клоппнинг хизматлари экани, шубҳасиз. Биз учун энг муҳим ғалаба. Футбол тарихига киришни истаймиз. Нима қилиш керак эканлигини яхши биламиз.Маурисио Почеттино, «Тоттенҳэм» бош мураббийи

Фаолиятимни омадсиз деб бўлмайди. 2012 йилдан бошлаб, агар 2017 йилни ҳисобга олмасак, ҳар мавсум финалларда иштирок этдим. Балки, ярим финалларда ғалаба қозониш бўйича рекордчидирман. Агар бу ҳақида китоб ёзадиган бўлса, ҳеч ким уни сотиб олмасди (кулади). Одамлар бизнинг фаворит эканлигимизни айтаётганидан хабарим бор. Аммо ўйиндан олдин ҳеч қайси жамоада устунлик йўқ эканлигини таъкидлаш лозим. Кучлар тенг.

Юрген Клопп, «Ливерпуль» бош мураббийи

Учрашув бошлангунга қадар эса қирғиз ёшларининг миллий мусиқа чолғу асбобларида Чемпионлар Лигаси мадҳиясини ижросини эшитиб, томоша қилиб баҳо бериш имкониятингиз мавжуд, азиз мухлис!