Klopp Pochettinoga, Saloh esa Keynga qarshi. “Real”ning 1099 kun davom etgan hukmronligiga chek qo‘yiladigan YChL finali haqida

1-iyun oqshomida Madriddagi “Vanda Metropolitano” stadionida Yevropa Chempionlar Ligasining yangi g‘olibi aniqlanadi. Shu bilan birga “Qirollik klubi”ning Yevropada 1099 kun davom etgan gegemonligiga ham ramziy ham rasmiy ma’noda yakun yasaladi.

Madriddagi final katta ehtimol bilan ikki ingliz jamoasining o‘zaro hisob-kitobi sifatida ham yodda qoladi. So‘nggi yillarda Yevrokuboklar borasida omadi chopmayotgan inglizlarning bir yo‘la to‘rt jamoasi 2018/19-yilgi mavsumga (“Manchester Yunayted”ning Yevropa Ligasidagi g‘alabasiga hurmat saqlagan holda) kelib, “qora an’ana”ga barham bera oldi. Bokuda o‘tgan Yevropa Ligasi finalida Londonning ikki jamoasi bellashib, omad “Chelsi” tarafida bo‘lgani hali ko‘pchilikning yodidan ko‘tarilmagani aniq. Bugun esa “Tottenhem” hamda “Liverpul” Yevropaning eng nufuzli sovrini — “shalpangquloq” kubokning yangi sohibi kim bo‘lishini aniqlab beradi.

Keling final bellashuvidan oldin biroz jamoalarning hal qiluvchi bahsga qadar bosib o‘tgan yo‘li va uchrashuvga oid qiziqarli faktlar haqida suhbatlashamiz.

“Tottenhem”

Maurisio Pochettino boshliq “Tottenhem” guruh bosqichidan amallab o‘tib oldi. Jamoa guruhda “Barselona”, PSV va “Inter” jamoalari bilan pley-off yo‘llanmasi uchun kurash olib bordi. Pley-off yo‘llanmasi “shporlar”ga so‘nggi turga kelibgina nasib etdi. “Tottenhem” 6-turda “Barselona”ni safarda yengishi kerak edi. Ammo klub durangdan nariga o‘ta olmadi. Biroq parallel kechgan bahsda “Inter” PSVni yuta olmay, London klubining guruhdan chiqishiga ko‘maklashib yubordi. Pochettino jamoasi pley-offga chiqdi. “Inter” esa Yevropa Ligasiga ravona bo‘ldi. “Tottenhem” guruh bosqichini qanday xavotirli o‘tkazgan bo‘lsa, pley-off bosqichi ham bundan kam bo‘lmadi. Jamoa chorak finalda Pep Gvardiolaning “Manchester Siti”ni safarda urilgan gol evaziga mag‘lub etib, yarim final yo‘llanmasini o‘ziniki qildi. ½ final ko‘pchilikning yodida bo‘lsa kerak. Londondagi o‘yinda “Ayaks” bitta to‘p farqi bilan g‘alaba qozongan bo‘lsa, javob bellashuvida Lukas Mouraning so‘nggi daqiqada kiritgan goli “Tottenhem”ni Madridda bo‘lib o‘tadigan final ishtirokchisiga aylantirdi.

“Liverpul”

“Liverpul” bosib o‘tgan yo‘l ham “Tottenhem”nikidan qolishmaydi. Jamoa guruhda PSJ, “Napoli” va “Srvena Zvezda” bilan ta’bir joiz bo‘lsa, jang olib bordi. Klopp shogirdlari guruhda safardagi barcha o‘yinni boy berdi. Ammo so‘nggi turda o‘zi uchun kerakli bo‘lgan natijani qayd eta oldi. “Napoli” minimal hisobda mag‘lub etildi va pley-off yo‘llanmasi naqd qilindi. Chorak finalda mersisaydliklar “Portu”ni qiyinchiliksiz (6:1) mag‘lub etdi. Yarim final esa misoli hayot-mamot jangini eslatib yubordi. “Liverpul” safarda Leo Messi yetakchiligidagi “Barselona”ga 0:3 hisobida yutqazdi. “Enfild”dagi javob bellashuvida esa “qizillar” 4:0 hisobida g‘alaba qozonib, o‘ziga xos tarix yaratgan holda Madrid chiptalariga buyurtma berishdi.

Ikkala jamoa ham finalga osonlikcha yetib kelgani yo‘q. Shunday ekan, final bellashuvi ham murosasiz kurashlarga boy bo‘lishiga umid qilib qolamiz.

Qiziqarli faktlar

1. “Tottenhem” va “Liverpul” o‘zaro 170 marta to‘qnash kelgan. 79 marta “qizillar”, 48 bora esa “shporlar”ning qo‘li baland kelgan. 43 marta tomonlar durangga rozi bo‘lgan. Gollar nisbati ham “Liverpul” foydasiga 266:195.
2. Jamoalar 1973-yil Yevrokuboklar tarixidagi o‘zlarning ilk va so‘nggi duelini o‘tkazgan. UEFA Kubogining yarim finali doirasida “Liverpul” “Tottenhem”ni safarda urilgan gol evaziga (1:0, 1:2) mag‘lub etib, finalga chiqqandi.
3. Tomonlar umuman final doirasida faqat bir marta o‘zaro duch kelgan. Xususan, 1982-yil Angliya Superkubogi doirasida “Liverpul” “Tottenhem”ni 1:0 hisobida taslim etgan va sovrinni o‘ziniki qilgan.
4. Bu uchrashuv Pochettino va Kloppning o‘zaro 10-to‘qnashuvi bo‘ladi. Hozirgacha Klopp jamoasi bilan 4 ta g‘alabani qo‘lga kiritgan. Pochettino hisobida esa atigi bitta g‘alaba mavjud. 4 ta bellashuvda esa durang qayd etilgan.
5. Ikkala murabbiy ham Yevropa Chempionlar Ligasi bosh sovriniga ega chiqmagan. Ulardan bir bugun bu “an’ana”ga barham beradi.
6. “Tottenhem” Chempionlar Ligasi finalida ilk marta o‘ynaydi.
7. “Liverpul” safida Chempionlar Ligasida avval g‘olib chiqqan 2 nafar futbolchi bor — Starrij (2012-yil, “Chelsi” bilan) hamda Shakiri (2013-yil, “Bavariya” bilan).
8. “Tottenhem”da esa bunday o‘yinchi yo‘q.
9. Bu Madrid mezbonligida o‘tayotgan beshinchi Chempionlar Ligasi finalidir (1957, 1969, 1980, 2010 — barcha finallarga “Santyago Bernabeu” mezbonlik qilgan).
10. Sissoko (“Tottenhem”) va Veynaldum (“Liverpul”) uch yil oldin “Nyukasl” safida APLdan Chempionshipga tushib ketgandi, endi esa ular bir-biriga qarshi Chempionlar Ligasi finalida maydonga tushadi.

Taxminiy tarkiblar

Finaldan oldingi fikrlar

Biz o‘yindan rohatlanishga to‘liqligicha tayyormiz. Bir-birimizni yaxshi bilamiz. O‘zimizga ishonamiz. Eng asosiysi — o‘z ishimizni yaxshi kayfiyat bilan qila olishimiz. “Liverpul” juda yaxshi jamoa. “Siti” va “qizillar” Angliyaning eng yaxshi ikki jamoasi. Ular APL bosh sovrini uchun oxirigacha kurashdi, ammo Chempionlar Ligasida ham qoyilmaqom o‘ynaganini ham qayd etish joiz. Bu fantastik murabbiy Yurgen Kloppning xizmatlari ekani, shubhasiz. Biz uchun eng muhim g‘alaba. Futbol tarixiga kirishni istaymiz. Nima qilish kerak ekanligini yaxshi bilamiz.Maurisio Pochettino, “Tottenhem” bosh murabbiyi

Faoliyatimni omadsiz deb bo‘lmaydi. 2012-yildan boshlab, agar 2017-yilni hisobga olmasak, har mavsum finallarda ishtirok etdim. Balki, yarim finallarda g‘alaba qozonish bo‘yicha rekordchidirman. Agar bu haqida kitob yozadigan bo‘lsa, hech kim uni sotib olmasdi (kuladi). Odamlar bizning favorit ekanligimizni aytayotganidan xabarim bor. Ammo o‘yindan oldin hech qaysi jamoada ustunlik yo‘q ekanligini ta’kidlash lozim. Kuchlar teng.

Yurgen Klopp, “Liverpul” bosh murabbiyi

Uchrashuv boshlangunga qadar esa qirg‘iz yoshlarining milliy musiqa cholg‘u asboblarida Chempionlar Ligasi madhiyasini ijrosini eshitib, tomosha qilib baho berish imkoniyatingiz mavjud, aziz muxlis!