Парламент қуйи палатасида кўриб чиқиш учун тайёрланган янги қонун лойиҳасининг дастлабки вариантида мазкур меъёр ўз аксини топган бўлиб, ҳозирда ушбу ҳужжат кенг жамоатчилик ва эксперт доиралари муҳокамасидан ўтказилмоқда. Бу ҳақда Қонунчилик палатаси депутати Раҳимжон Ҳакимов фикр юритган.
«Фаол инвестициялар ва ижтимоий ривожланиш йили» давлат дастурининг 28-бандида ҳокимнинг халқ депутатлари кенгаши раиси сифатидаги мақомини бекор қилиш назарда тутилди.
Давлат дастурининг ушбу банди ижросини таъминлаш мақсадида Олий Мажлис Қонунчилик палатаси ва Сенати кенгашларининг 2019 йил 3 апрелдаги қўшма қарори билан вилоят, туман, шаҳар ҳокимларининг халқ депутатлари кенгаши раиси сифатидаги мақомини бекор қилиш бўйича чора-тадбирлар дастури тасдиқланиб, парламент палаталари, тегишли вазирлик ва идоралар вакилларидан иборат таркибда ишчи гуруҳ тузилди.
Қонунчилик муаммолари ва парламент тадқиқотлари институти томонидан Жанубий Корея, Япония, Канада, Грузия, Туркия, Россия ва Қозоғистон сингари қатор давлатларнинг маҳаллий вакиллик ва ижро органлари раҳбарлари мақоми ва ваколатлари бўйича тажрибаси ўрганилиб, ушбу мавзуларда олиб борилган фундаментал ва амалий-илмий тадқиқотлар таҳлил қилинди, амалдаги қонун ҳужжатларининг тўлиқ инвентаризацияси ўтказилди.
Ишчи гуруҳ томонидан ҳокимнинг халқ депутатлари кенгаши раиси сифатидаги мақоми бекор қилиниши муносабати билан келиб чиқиши мумкин бўлган масалалар — кенгашлар фаолиятини такомиллаштириш, штат бирликларига бўлган эҳтиёж ва бошқа масалалар жойларга чиқиб ўрганилди. Ушбу масала юзасидан ижтимоий сўровлар олиб борилиб, тегишли таклиф ва тавсиялар ишлаб чиқилди.
Танқидий таҳлил тарзида амалга оширилган чора-тадбирлар натижасида ишчи гуруҳ, шунингдек, Қонунчилик муаммолари ва парламент тадқиқотлари институти томонидан «Ҳокимнинг халқ депутатлари кенгаши раиси сифатидаги мақоми бекор қилиниши муносабати билан Ўзбекистон Республикасининг айрим қонун ҳужжатларига ўзгартиш ва қўшимчалар киритиш тўғрисида»ги қонун лойиҳасининг дастлабки варианти ишлаб чиқилди.
Мазкур қонун лойиҳасида:
Ҳокимларнинг маҳаллий вакиллик органлари раҳбарлари сифатидаги мақомини бекор қилиш;
халқ депутатлари кенгаши раиси лавозимини жорий қилиш;
халқ депутатлари кенгаши раиси ва унинг ўринбосарларининг мақоми;
кенгашларда доимий асосда ишловчи депутатлар фаолиятини ташкил этиш;
халқ депутатлари кенгаши раиси ва унинг ўринбосарини сайлаш тартиби;
халқ депутатлари кенгаши фаолиятини самарали ташкил этиш ҳамда доимий комиссиялар ишини мувофиқлаштириб бориш мақсадида Раёсат ташкил этиш;
халқ депутатлари кенгашида доимий асосда ишловчи депутатлар фаолиятининг кафолатларини белгилаш;
халқ депутатлари кенгашлари фаолиятига ташкилий, моддий-техник ва ахборот-таҳлилий жиҳатдан кўмаклашувчи котибиятлар фаолиятини ташкил қилиш каби комплекс масалалар ўз ечимини топган.
Ҳозирда мазкур қонун лойиҳаси кенг жамоатчилик ва эксперт доиралари муҳокамасидан ўтмоқда.
Изоҳ (0)