Давлат солиқ қўмитаси Матбуот хизмати 2019 йил 29 май куни ижтимоий тармоқларга жойлаштирилган Caravan Group ресторанлар тармоғи раҳбари Т.Мусин томонидан солиқ органлари Яккасарой тумани Абдулла Қаҳҳор кўчаси, 22-уйда жойлашган умумий овқатланиш объектига асоссиз равишда текшириш ўтказишга келганлиги ёритилган маълумотни ўрганиб чиқди.
Таркибида Яккасарой тумани давлат солиқ инспекцияси бошлиғи ўринбосари Шерзод Таслимов ҳам жалб этилган умумий овқатланиш объектига ташриф буюрган Ишчи гуруҳи, ҳудудни янада ободонлаштириш ва ижтимоий-иқтисодий ривожлантириш учун мавжуд муаммоларни ўрганиш ва таклифлар олиш бўйича тумандаги барча маҳаллаларда иш олиб бормоқда ва текшириш ўтказиш ваколатига эга эмас.
Давлат солиқ қўмитаси тадбиркорлик субъектларида ноқонуний текширишлар ўтказиш ёки уларнинг фаолиятига ноқонуний аралашиш ҳолатлари кузатилган бўлса, жиддий чора кўрилиши ва ҳар бир тадбиркорнинг ҳуқуқлари ҳимоя қилинишини маълум қилади.
Ҳар қандай ноқонуний текширишлар ва аралашувлар бўйича аҳолидан (71) 244-98-98 ёки 1198 қисқа рақамлари орқали Давлат солиқ қўмитасининг «Ишонч телефони»га хабар бериш сўралган.
Аввалроқ Мажбурий ижро бюроси ижтимоий тармоқларда Caravan Group МЧЖ ресторанлари билан боғлиқ вазият борасида тарқалган маълумотга расмий муносабат билдирган эди.
Изоҳ (0)