АҚШ Молия вазирлиги 2020 йилда Америкада қулликка қарши ҳаракат иштирокчиларидан бўлган Гарриет Табмен портрети акс этган банкноталарни чиқаришдан бош тортди. Бу ҳақда Meduza хабар берди.
Молия вазири Стивен Мнучиннинг маълум қилишича, 20 долларлик банкноталар дизайни 2028 йилгача ўзгармайди.
Банкнота дизайнини ўзгартириш ҳақида қарор қиларкан, вазир биринчи навбатда уларнинг қалбакилаштирилишини олдини олиш кўзда тутилганини тушунтирган. «Шундан келиб чиққан ҳолда дастлаб 10 ва 50 долларлик купюралар янги дизайнда чиқарилади», — деган Мнучин.
Табмен портрети акс этган банкнота долларда афроамерикалик сурати туширилган биринчи ҳолат бўлиши кутилмоқда. Бундан ташқари, қулликка қарши ҳаракат қаҳрамони XIX аср охиридан бери долларга портрети туширилган биринчи аёл бўлади.
АҚШ Молия вазирлиги 20 долларлик банкноталарда Табмен портретини жойлаш режаси ҳақида 2016 йилда эълон қилган. Вазирнинг маълум қилишича, унинг портретини жойлаш кўпчилик америкаликлар мурожаатига кўра танланган.
Аёл портрети туширилган банкноталар чиқариш аёллар овоз бериш ҳуқуқи тўғрисида АҚШ Конституциясига 19-ўзгариш киритилганининг 100 йиллиги кунига мўлжаллаш режалаштирилган эди.
Амалдаги 20 долларлик купюрада АҚШнинг еттинчи президенти Эндрю Жексон портрети туширилган.
Изоҳ (0)