22 майнинг эътиборга молик янгиликлари — «Дарё» дайжестида.
Наманган вилояти Чуст туманидаги фермер даласидан булоқ чиққан ва унинг суви шифобахшлиги учун минглаб одамлар шу ерга оқиб келмоқда.
Таъкидланишича, ҳатто қўшни вилоятлардан ҳам мазкур булоқ суви учун одамлар навбат кутмоқда.
***
Самвел Бабаян Тошкентнинг «Локомотив» клуби бош мураббийи этиб тайинланади.
Маълумотларга кўра, «темирйўлчилар» раҳбарияти жамоанинг сўнгги вақтлардаги натижасидан қониқиш ҳосил қилмаган ва бош мураббий Андрей Фёдоровни истеъфога чиқаришга қарор қилган. Унинг ўрнига клуб президентининг маслаҳатчиси сифатида ишлаб келаётган Самвел Бабаян тайинланган. Тез орада бу борадаги расмий маълумот чиқиши кутилмоқда.
***
Муфтий Усмонхон Алимов 21 май куни Вашингтондаги АҚШ Тинчлик институтида ташкил этилган давра суҳбатида нутқ сўзлади.
Тадбир Ўзбекистоннинг АҚШдаги элчихонаси ва АҚШ Тинчлик институти томонидан ташкил этилган бўлиб, унда Усмонхон Алимов Ўзбекистонда диний-маърифий ва эътиқод эркинлиги борасида амалга оширилаётган ислоҳотлар ҳақида маълумот берди.
***
«Меним фикрим» жамоавий мурожаатлари порталида транспорт воситаларини тюнинг қилдиришга қонунчилик даражасида рухсат бериш тўғрисида петиция пайдо бўлди.
Мурожаат матнида айтилишича, бу қўшимча иш ўринлари ва соҳада ноёб миллий брендлар яралишига имкон беради.
***
Қамчиқ довонида янги туннел барпо этиш таклиф этилмоқда.
Унинг узунлиги 19 километр бўлиб, автотранспортларнинг ҳаракатланиши учун қатор қулайликлар яратилади. Бундан ташқари, бу каби лойиҳанинг амалга оширилиши йўлда ҳаракат хавфсизлиги юқори даражада таъминланиши ва юк машиналарининг манзилга етиб бориш вақти анча қисқаришига олиб келади.
Изоҳ (0)