Тошкент врачлар малакасини ошириш институти ва GE Healthcare компанияси ҳамкорлигида ўқув-симуляция маркази фойдаланишга топширилди. Бу ҳақда ЎзА хабар берди.
— Бу ўқув-симуляция маркази соҳа мутахассисларининг амалий кўникмаларини шакллантириш ва ривожлантиришда муҳим ўрин эгаллайди. Унда тингловчилар олган назарий билимларини замонавий ультратовушли ускуналарда амалда синаб, ўз билимини мустаҳкамлайди, — деди институт профессори Акрам Фозилов. —Биринчи навбатда бу аёллар соғлиғи ва пренатал ташхис билан шуғулланувчи шифокорларга тааллуқлидир. GE Healthcare Ўзбекистон соғлиқни сақлаш тизимини модернизация қилиш лойиҳаларида фаол иштирок этиб келмоқда. Хусусан, перинатал тиббий хизматни ривожлантириш давлат дастури доирасида мамлакатдаги 200 та кўп тармоқли поликлиника компаниянинг сўнгги ультратовуш ташхис қўйиш сканерлари билан таъминланди.
Марказда тингловчиларга маҳаллий ва хорижлик мутахассислар акушерлик, гинекология, кардиология ва умумий визуаллаштириш йўналишлари бўйича таълим беради. Бу ерда GE Healthcare компаниясининг замонавий ультратовушли тиббий ташхис ускунаси, интерактив анатомик атлас ва ультратовушли фетал фантом ўрнатилган бўлиб, шифокорлар назарий билим олиш билан бир қаторда юқори технологик ускуналарда тадқиқотлар ўтказиши мумкин.
Изоҳ (0)