Marche du Film кинобозорида очилган миллий павильонда Халқаро кинокомиссиялар ассоциацияси (AFCI) президенти Жесс Коноплиа билан учрашув бўлиб ўтди. Бу ҳақда «Дарё»га Ёшлар медиа маркази маълум қилди.
Унда Ўзбекистон миллий кинокомиссияси ушбу нуфузли халқаро ассоциацияга аъзо бўлди. Жесс Коноплиа Марказий Осиёда илк бор Ўзбекистон миллий кинокомиссиясига аъзолик сертификатини топширди.
Учрашув давомида Ўзбекистоннинг хорижий кинолойиҳаларни амалга ошириш (копродакшн) салоҳияти ҳамда кинолокациялари жозибадорлиги тақдим этилди. Ассоциация билан истиқболли ҳамкорлик хам муҳокама қилинди.
AFCI’га аъзо бўлиш билан Ўзбекистон миллий кинокомиссияси бутун дунёдаги кинокомиссиялар маълумотлари базасига киритилади, жаҳоннинг энг йирик продюсерлари ва кинокомпаниялари шу ассоциация орқали Ўзбекистонни суратга олиш учун манзил сифатида кашф қилади.
Ундан ташқари, маҳаллий киномутахассислар ўз тажрибаларини оширишлари учун хорижий конференция ва ўқув машғулотларига жалб қилинади.
Маълумот учун, штаб-квартираси АҚШнинг Лос-Анжелес шаҳрида жойлашган Халқаро кинокомиссиялар ассоциацияси (AFCI)га дунёдаги 300 дан ортиқ кинокомиссия аъзо бўлган.
Изоҳ (0)