14 май куни 72-халқаро Канн фестивали доирасидаги Marché du Film кинобозорида Ўзбекистон миллий павильонининг расмий очилиш маросими бўлиб ўтди. Бу ҳақда «Дарё»га Ёшлар медиа маркази маълум қилди.
Ўзбекистон миллий павильони иккинчи йил мамлакат киноиндустрия салоҳиятини Каннда расман намойиш қилмоқда. Ушбу кўргазма ва музокаралар майдончаси Ёшлар иттифоқи, Туризмни ривожлантириш қўмитаси, Кинематографияни ривожлантириш маркази, Миллий кинокомиссияси томонидан Ўзбекистоннинг Франциядаги элчихонаси кўмагида ташкил қилинди.
Marché du Film кинобозори бош ташкилотчиси Арно Мениндес Ўзбекистон миллий павилон очилишида шахсан иштирок этди.
«Йилдан йилга кинобозоримиз географияси кенгаймоқда ва унда Ўзбекистон иккинчи йил қатнашаётганидан хурсандмиз. Ишонамизки, Ўзбекистоннинг гўзал гўшалари суратга олиш учун жозибали локация сифатида жаҳон киноижодкорларида қизиқиш уйғота олади», — деди Арно Мениндес.
Кино саноати мутахассислари ва ижодкорлардан таркиб топган Ўзбекистон делегациясининг асосий вазифаси мамлакатнинг кино локациялари ҳамда хорижий кинолойиҳаларни амалга ошириш (копродакшн) салоҳиятини тақдим этишдан иборат.
Миллий павильон фаолияти давомида хорижлик продюсерлар ва халқаро кинокомпанияларни Ўзбекистонда суратга олиш учун жалб қилиш, шунингдек, 2019 йил 26—30 ноябрь кунлари Тошкентда бўлиб ўтадиган PROlogue халқаро кинофестивалига дунёнинг турли нуқталаридан қатнашчи ва ҳайъат аъзоларини таклиф қилиш бўйича учрашув ва музокаралар ўтказилади.
Изоҳ (0)